本欄近兩年長期推介港交所（388）、國泰航空（293）及維他奶（345）。但不能期期講喎，悶死人咩。例如前一周忠告大家趁業績公布股價調整快掃國泰，結果就由逾10.4元升咗上10.8元，唔想再多講喇，自己分析啦。
但維他奶呢，真係唔講唔得，因俾老友問到燒電話線。因為又由9元左右爆升，上周四一度衝上10.3元，當日成交過千萬股，當然是有不尋常事在發生。係乜？你問我我問邊個？總之呢吓異動，一定有原因。
股東非蠱惑炒家或暴發戶
我在8.8元推介維他奶後，不少讀者及老友已經在9元至9.5元間走咗幾轉。小弟又如何？完全冇郁！因深信「大茶飯」會稍後出現，三幾毫移動，冇乜興趣。
維他奶是隻傳統又扎實的正氣股，兩大持有的股東皆非蠱蠱惑惑炒家或暴發戶，一方是老牌羅氏家族，另一方是新加坡首富黃氏家族。
小弟去年指出，擁有楊協成飲品集團的黃廷芳家族，長期希望成為全球汽水以外的飲品業「巨人」，故等呀等，終於等到維他奶因「政治不幸事件」搞到股價插水，立即閃電出手，目標當然不會是細眉細眼的短炒。
合作或開戰都有利股價
好嘞，如今兩大家族實力相若，若肯坐低傾合作的話，將出現極強Synergy力量，「雙劍合壁」下，除可口可樂集團外，全球冇飲品集團夠佢大，坐硬第二把交椅，如此，股價必飛升。倒轉，若兩大家族冇計傾或傾唔掂數開打收購戰，咁當然會各自狂掃散戶碎股，然後撼一鋪勁，睇睇邊個手瓜硬。
即無論合作或開戰，都應該有利股價飆升，問題是雙方用幾多資金、時間及耐力去「鍊」。
過去兩月，維化奶密密吸股密密注銷，已是一個重要訊號，但出價多為約近9.2元，好有耐性。終於，上周四唔聲唔聲，一開就見9.55元，兩吓已鏟上10.3元，怎不令我電話大響？
之後，回落到9.8元左右，應該是大量散戶見有甜頭，蜂湧出貨，故才出現過千萬股成交。這一下，應有人收咗大量散戶貨。後着如何，下回分解！
資深傳媒人 曾智華
