曾智華
嘩嘩，你唔好去搶？
這正是小弟前朝睇到《星島日報》頭條的即時反應。大佬呀，你做公共事業㗎，唔係在賭枱上與對手玩「沙蟹」呀，咁樣開天殺價，想政府及市民點反應呢？是聰明定蠢蛋呀？
頭條係乜？先重複——四巴士公司申請加價，最高17.7%，理由為戰事推高油價削盈餘，被轟開天殺價超通脹。
兒時，長者罵人貪得無厭，必定指住對方個頭：「你啊，飛擒大咬，唔好去搶？」
萬事追尋元兇，正是如今乞盡七成半國人憎的美國總統特朗普，無澄澄在年初聯同以色列，用啲無人信的荒謬理由夾埋打伊朗，原本以為強強聯手，半臂已可將伊朗從文明世界中「抹掉」。點知唔打唔知身體弱，原來兩個大國「恰」國仔，例如巴勒斯坦或委內瑞拉就掂，一面對「文明古國」，立即變深陷泥沼，不單難以自拔，兼且搞到全世界油價爆升，個個受害，包括所有美國人，當然畀人怨死。
如今，呢場累人累物累街坊鬧劇，唔知點收科嘞。首先，當然共和黨中期選舉可能輸到瞓街，但冇人同情，鬼叫你推個特朗普出嚟，理應自吃苦果。
但影響下，香港人也無辜，油價飛升令各行各業百上加斤。
對，公共巴士在這種情況下經營困難，大家同情，政府津貼及批准合理加價，無人反對。但你一開口就最高要求17.7%，咁就難免畀人「趁火打劫」形象。
如今，要睇運輸及物流局局長陳美寶如何把關嘞。政府代表最有利，為有「民意譁然」牌，如此，與四大公司鬥出牌時，就大有本錢。總之，無論批准加幾多，都必定要有一條款——油價回落，票價就回落，咪似油公司咁側側膊，加咗就死都唔減返。