美國總統最近換上一頭銀髮，搞邊科，唔通稍後舉行個人演唱會，你估你係BLACKPINK呀？「咁又唔好咁講，你知嚟緊嗰個迎月日，傳國家主席習近平訪美，屆時有一個中國CEO天團隨行，高潮係白宮國宴，呢次香港有運行囉。」
唔知大師兄噏乜，莫非國產科技股唔多掂檔，受咗一些刺激？「老友，美國消息人士稱，特朗普正在釋放訊號，表明中國支持美國，兩國未來投資增加，目的在中期選舉前，為共和黨製造利好經濟。」明白，咁就係令股民相信未來中美緩和，你好我好，香港更好。
我說，事關內地好多科技公司排隊在香港上市，美國只要靜靜地唔好搞事，阿爺有信心催谷好市場環境，屆時股海一帆風順，嗱，各位唔使擔心，AI股尤其是，可以趁低入市，事關全世界有本事令世界和平，只有兩個國家，你懂的，大家唔係有默契，特總哪會搞呢場大龍鳳。
「唱好中美經濟金融，無需要改換金髮招牌形象。」純粹靠估，特總近日勞心勞力，搞AI漫畫創作，作品叫好叫座，欲罷不能，如是者，特總一夜白頭，金髮變銀髮，幾好睇吖。
事實上，特總係間接鼓勵「全民AI」，更好跟中國良性競爭。內地網民一片好評︰「感覺有了特朗普，美國面貌煥然一新了。」「全世界確實大開眼界，AI確實在改變世界」「看看，日理萬機的美國總統，每天都要抽出這麼多時間發AI圖片啦！」嘩，擺明做好AI個市，你話係唔係嘅啫。