曾智華
哈哈哈，奀奀哋，又中！小弟再三提醒大家，投注應堅守的原則，就是——馬會派錢，一定收，收完捐咗佢都好。
上周日馬會又派錢，「嘉應高昇」及「浪漫勇士」高晒兼主場，根本冇得跑，故最佳是買W二串一，然後嗌吓，舒展身心。
果然Easy Win！「里見夢境」及「蒙面舞會」兩大日本馬王，跑盡都只能接近就收工，其他國家代表，更加全部食塵。
呢類賽事，贏硬我都唔會瞓身，因知道世事無絕對，有一個無人能預測及控制的現象，名叫——意外。多年觀馬生涯，見唔少。
結果，投注二十元二串一W，執七十幾蚊，當晚買咗盒滷水鵝肉返歸送紅酒，正斗之至。
跑完「女皇盃」，馬季正式步向尾聲，延續的精彩，當然是冠軍練馬師之爭。至今方嘉柏只領先一場，廖康銘與沈集成死命進逼，咬住唔放，每個賽事日皆將鬥到死盡細胞。
老友問：「喂，碌Sir，希斯有冇機會？」
「冇！」實牙實齒，「因希廄四十六場W，有六場來自『嘉應高昇』，旗下戰馬實力並不平均；沈廄也如是，四十九場W，有四場來自『浪漫勇士』，以上兩匹，應該今季唔再出喇！」
個人分析，到最後仍是方嘉柏與廖康銘之爭，方仔有莫雷拉瞓身效力，高一線。
講返今晚，小弟捧邊個？只捧一個——布浩榮。佢騎四隻，三隻有機會，皆排好檔。
尤其第二場「海鑽石」，跑過三次，初亮相的一場，在沙田千二米入第四已最叻，看似未懂競賽為何物，將換來較高賠率。
布仔三匹，「海鑽石」、「浪漫老撾」及「凡凡有餘」全有分頭，可三串七W（十蚊），再三串四P（二十蚊），一百五十蚊投注，可能有Big Tea Rice㗎！