曾智華
周三本欄賽馬貼士中規中矩，只畀兩隻，結果「獵寶勤」及「添喜運」排住返嚟，W派四十七元，超超哋，Q九十元，二重彩則近二百元，收晒貨。
空降的澳洲新星布浩榮有料到，騎七隻，一W兩P，初次亮相快活谷跑道有此表現，大家要盯緊，未來「潘頓」可能正是佢，26歲仔，大把前途。
至於莫雷拉，繼續令人失望，騎八場，只得一Q一P，遠離期望。
今次莫雷拉捲土重來，本來大家都望佢生生性性，認真拼搏，平衡一下馬圈有人隻手遮天的不良現象，點知跑咗幾個賽事日，唔多對路。早幾年，莫雷拉也曾「唔似莫雷拉」，眼神冇晒正氣，走位古靈精怪，結果M聲四起。當時小弟曾在此揶揄佢，不應再被稱「雷神」，應改稱「拉叔」，正是拉與縮的諧音。
今次再來，牌頭打正為練馬師方嘉柏爭冠軍，理所當然場場騎方仔馬，不應外借，因方廄馬主咁重錘請佢返來，若騎外線馬時，有乜閃失咪大鑊？再者，方仔點會放佢畀對手馬房？除非包尾幾個。
結果，上周日借咗莫雷拉畀葉楚航騎新勝馬「偵探傳奇」，我一睇，唔多妥喎，因隻馬剛剛由牌仔袁幸堯輕勝而回，如今再出，為乜唔用舊配搭，而要出到世界頂級騎師莫雷拉？一睇就知有點「雞棚味」，請君入甕也。結果熱到飛起，大家請睇巡邏影片，儍嘅都知「拉叔」有冇跑過，結果，好似食咗懵仔藥，雲遊馬場，保證要輸，輸足七個幾馬位，W出者乃是傳聞中佢兄弟田雞，騎隻「德心知遇」，爆十四倍冷門，玩死馬迷。
明日大賽，刨都無謂，一於全心捧香港隊，二串一「嘉應高昇」及「浪漫勇士」，贏完就唱——Hong Kong，我愛Hong Kong！