(曾智華)
錯就認，畀人掟番茄就企定。
講乜？講上周日賽馬，我個「唔刨大法」全捧騎師莫雷拉。結果投注三百元，輸二百幾元，雖然唔肉痛，但卻被一眾多口老友柴到飛起，冇得反駁，只得企定定硬食。
雷神出六隻，只有兩隻熱P，遠離估計。
寸得小弟最厲害者為「馬王R」，佢早早睇中女將袁幸堯，一亮相就追捧，當然大豐收。
袁小妹出賽十八次，竟有十四次獲獎金，包括四W一Q五P，擺明並非單靠輕磅咁簡單。小弟細觀佢策騎及鬥拉士，有板有眼，膽識過人，最後一百米與超級大師傅纏鬥時，心理質素極高，未驚過。論整體表現，高師姐黃寶妮起碼半班，只要上陣機會足夠，香港女騎師可以話——A Star Is Born。
講返「馬王R」，針住小弟個「唔刨大法」奚落：「碌Sir，用你個方法捧莫雷拉，邊有肉食㗎？上次快活谷，贏四W，你都只能賺餐消夜，好奀啫。嗱嗱，小弟就唔同嘞，同樣用你的方法，沙田賽事六隻捧袁幸堯，投注三百大元，單單兩隻W，已收二百六十幾元，另外三隻二十幾蚊位置，三串四二十蚊過關，唔該你計吓派幾多啦，哈哈！」
小弟是否瘀爆玻璃冇晒癮？唔係！你話陌生人無情情窒我就話啫，但幾十年老友，你窒吓我，我窒吓你，咁才是真正人生。
唔畀人窒得？去選美國總統啦，可以做霸王亂噏，對個個肆無忌憚爆粗，喜歡炸邊個就炸邊個，唯一要小心收尾幾年大禍回報，明唔明？
今晚回歸快活谷，我繼續沿用「唔刨大法」捧雷神，再用真金白銀做實驗。佢出八隻，一於頭兩場二串三W、二串一P二十蚊，其餘六場，每三場三串七W十蚊，三串四P二十蚊。能否剝「馬王R」棚牙呢？