(曾智華)
哈哈，各位老友，究竟你周三跑馬地賽事有冇跟我個「唔刨大法」呢？每三隻雷神馬就過關三串七W（十元），三串四P（二十元），結果贏咗九十幾元，夠落土瓜灣整碗及第粥送炸兩了！
有莫雷拉在，馬迷即有「扶手棍」，肯定會投注額大升，加上佢騎馬有藝術成份，非常好看，必可吸引新馬迷加入欣賞。至於畀「軟硬鞭」激到揚言戒賭一族，也可能逐個回歸。
不過，馬圈乃金錢世界，整體生態當然容納不下「純正氣」者，意即你間中要跟返大隊，咪變獨家村，場場搞喎個「劇本」也。
「唔刨大法」買莫雷拉，只可應用在頭三幾次賽事，發展下去，若大家開始見到佢間中走死位、出閘窒步、兜大彎入直路嘥馬力，又或無情情混入馬叢博冇位上……當然，更可能似「軟硬鞭」及「哈囉文」般，突然夢遊馬場，咁你就要執生，切忌一本通書睇到老喇。
不過，明天乃雷神返沙田馬場第一次，「正氣」應仍會繼續，老友，幾十萬對眼睛𥄫實，加上要報答成身汗加天價請佢返香港的方嘉柏，方仔一日未坐定粒六攞冠軍，雷神仍會盡量「去」！
明日我會繼續沿用「唔刨大法」落注，一樣係三串七W（十元），三串四P（二十元），睇睇有冇收穫（大？）！
頭三隻過關為「順善寶」、「騰達勇士」及「哥倫布」，另外三隻為「昭易搵」、「川河帥駒」及「信心星」。
莫雷拉坐騎一開買就會過熱，非常誇張。不過，到真正開賽前，賠率就會回歸理性。到底，一匹馬能否W，正如董驃生前講：「跑馬跑馬，先講馬而非講騎師！」會飛的騎師騎著隻豬，也絕無可能贏。
望明天捧雷神，又再有得場場嗌，騎出不可能的賽果，Yeah！