曾智華
一向用《賽馬日在線》睇直播，但上周日谷鬼氣，因跑「日本二千堅尼」時，竟冇得播。難明馬會想點，你畀得香港賽事條Feed人，為乜抽起外國賽事？簡直倒米！
站在馬會立場，理應越多人講馬、播馬及寫馬，令其更普及會更好？如今似乎唔係。馬會從冇政策鼓勵坊間媒體，吸引更多有分量者入行。
賽馬，是一個節目，越多人睇越好。昔日的董驃，點解吸引到非馬迷蜂擁捧場？正因佢「並非齋講馬咁簡單」，而是一位有魅力的表演者。
對，天才不易有，更不易發掘。但觀乎過去二十年與馬會有關的賽馬節目，雖不至悶到抽筋，但也難吸引非馬迷甚至馬迷睇睇。
點解？正因十之七八毫無娛樂性可言，兼且主持講嘢，似乎日比日怕觸碰紅線，故個個窒吓窒吓。
其實馬會財雄勢大又獨家，理應信心十足，胸襟廣闊，歡迎批評，將賽馬節目搞得五光十色百花齊放，凡有心有力有誠意做賽馬節目的YouTube Channel，一律贊助，鼓勵人人搞「賽馬好聲音」比賽，刺激更多年輕人入行做馬評人及主持。
馬會多年來強調培養年輕馬迷接班，但搞來搞去都冇善用接觸面最廣的大眾媒介，包括電視、電台及報章，更未見雄心勃勃攻佔如今滲透力最勁的網上領域。
馬季即將結束，馬會要靠延續播海外馬維持馬迷熱情，但觀乎如今有關海外馬賽事提供的資料及播放頻道，仍遠遠未符公眾需求，馬會太欠主動性喇。
小弟作為堅貞馬迷，非常肉緊這盤「慈善事業」，為乜未能做到最好？
今晚我研究第一場「垃圾馬」，「添喜運」擺明搵潘頓救馬，當然，鄭俊偉也要救埋自己！攔路虎是「獵寶勤」，對碰W可也。