每年七月前後，適逢榴槤當造季節，榴槤控紛紛出動，榴槤放題依然旺場場場爆，元朗屏山鄧鄉紳達智，榴槤超級忠粉，每年均專程飛赴檳城品嘗樹上熟貓山王。
有些食物是不能在家吃，被譽為「水果之王」的榴槤屬重口味之物，又香又臭又好味又攻鼻，平常人對榴槤只有愛與恨兩種極端的感情，冇中間路線，榴槤可增強身體免疫力，保持骨骼健康，防止骨質疏鬆。
果王即是果王，渾身是寶，用榴槤殼當容器盛水洗手，可以辟除殘留手上的氣味，盛水喝可沖洗味蕾兼降火，新加坡科學家成功把榴槤殼製成膠布，榴槤莖插在車廂通風口會產生神奇效果。
榴槤和山竹向來被視為夫妻果，是同樣盛產於東南亞的熱帶水果，如果榴槤係果王，山竹就一定係果后，吃完榴槤，最好吃山竹去火，山竹含豐富多種維他命B和維他命C和膳食礦物質，唯心臟病及糖尿病者則必須慎食，當心病情惡化。
飄來榴槤飄香，鮮甜軟腍，雪凍食，如奶油，如忌廉，如雪糕，人間美味，無與倫比。食過不同產地榴槤，首選始終是馬來西亞檳城出產，最好食，品種亦最豐富，D200係灰綠殼、果肉微黃、口感幼滑有層次的黑刺Ochee；D163係葫蘆Hor Lor；D175係果肉綿密清甜有回甘的紅蝦Ang Hae；圓殼大刺果肉灰白又濃又黏喉的是甲必利Capri；D164係橙色果肉味濃堅挺而乾身的坤寶Kun Poh；D197係啡綠殼、刺身短、果肉金黃、核仔細細入口即融、有回甘的老樹貓山王Musang King；D13金包被稱為貓山王表弟；還有D24山頂XO和D88小甜甜。馬來西亞榴槤品種達二百個之多，又 把又名稱，不能盡錄，榴槤控都會記得自己至愛的品種，仲有十個八個各自認為係必食的品種。剛於上周日晚在灣仔碼頭PIER 1929參加Monster Durian榴槤放題，集中品嘗老樹貓山王及貓山王，放題至八月二十四日，正心思思盤算湊夠腳再報名。
