曾智華
近年因食得多，認識不少飲食業好友，結下情緣，不時分享經營時的苦樂（八成苦，兩成樂），我聽到，進一步覺得，今時今日銀行利息咁高，走去投資開餐館，真係心理「唔多正常」，攞苦嚟辛也。
香港最頂級食府（唔開名啦）負責人W哥，前晚搵我吐苦水，順便問可以點搞。
「碌Sir，你睇我哋好巴閉，又米芝蓮，又豬籠入水，客人消費平均幾千元一位，但有個頭痛問題，完全無法解決。」
係乜？講出嚟都難以置信，就是樓面請唔到人。
一到卜爆，就要僱用「炒散」員工。呢類工作者，除對菜館零歸屬感外，更個個好似唔憂做咁，工作態度及專業性極難預測。次次大隊員工殺到，W哥心情就似等開大細，完全唔知開邊瓣。開「好」，當然冇問題，但若開「差」就弊，分分鐘得罪貴客，以後唔回頭。
W哥問我點解決，真係你問我，我問邊個？但倒看到一個商機，就是成立一個專攻高質素「炒散」樓面公司，比多一倍人工又或分紅，請一班唔想日日返工，但早早訓練有素的服務員，其實呢類人我認識唔少，可以返工當客串演出，純賺外快。
昨晚又與餐廳B傾，佢老哥好好彩，夫妻同心鎮住廚房樓面，故可保證出品及服務質素，但樓面咁大，坐滿成百客，仍要有十計員工。 大家知，今時今日的年輕員工非常有性格，絕對唔鬧得之餘，更會隨時消失，唔撈唔會預早通知。
B哥好幽默：「幾十年前我打餐館工，凡上司同我講——下班嚟見我，即時個心跳到卜卜聲，因驚被炒。好嘞，今天又如何？任何員工同我講想下班約見，哎呀呀，小弟個心同樣跳到卜卜聲，驚乜？正是驚佢炒我魷魚，唔撈呀！」