曾智華
每一個行業，都有傑出人物，全部不靠符碌，反之是經年累月修煉能人所不能的武功。
飲食業之中，冇人唔識嬌姐，昔日佢在鰂魚涌揸Fit細細間的「合時小廚」，巴閉到飛起，日日夜夜爆滿，一位難求。
做咗N年，終因租約期滿而要另覓地方，大老闆有大老闆諗法，嬌姐有嬌姐諗法，和平分手，如此武功高強人物，當然大把人搶。
點解嬌姐零舍犀利？因佢記憶力驚人，兼公關手腕玲瓏。小弟也是佢熟客，十幾年前替我寫過的菜單，竟仍存起，一講邊年邊月邊日食過乜，立即可以如數家珍。熟客口味全部掌握，個個信晒嬌姐，總之講出預算，佢就會同你拼出最好的一頓盛宴。
冇得唔服，小弟觀察，佢有三大成功法寶：
一、手機內有六千幾個熟客聯繫，按時按候會發訊息問候，並講講最新時令有乜正斗嘢，語帶溫婉，問幾時聚聚。
二、嬌姐在飲食行頭幾十年，由始至今，負責材料，廚房入貨，夠大手，數現金，故此，所有蔬菜海鮮肉類乾貨濕貨供應商皆錫晒佢，好嘢一定留畀佢。如此，大廚炮製的出品，質素當然勝人一籌。
三、永遠與大廚行孖咇，關係良好。昔日與廚神級人馬權哥拍住上做「合時小廚」，如今更勁，說得退休廚藝大師華哥（佢老公呀），放棄悠閒生活出山相助，夫妻同心，乜都變金，客人口福不淺。
四、精明領導，一定懂得建立Top Fit團隊，「嬌姐小廚」侍應個個奮力工作，以客為先，點解？因盤生意佢哋有份！越好生意，分紅越多，故此人手穩定外，個個都搏。
有晒以上四大原因，再加適當時間使出𠱁客絕招（無謂講穿晒），就咁，幾千熟客的心就牢牢扣住了。