曾智華 精彩人生自己創
唔知點解，近期小弟專欄，大受個別同業關注，不時引述外，更加添姿彩，搞到我好似乜都不滿，四圍發炮亂轟，真係多謝晒。
不過，各位老哥，介紹我時，請勿再用甚麼「前DJ」。老老實實，我的電台生涯，除咗頭兩年做通宵更之外，根本再冇做過DJ。
DJ，英文乃Disc Jockey，是負責打碟介紹音樂或歌曲的專業電台人。
我又如何？幾十年來，乃節目主持人，乃一個節目播出的幕前總負責人，十之七八與音樂無關㗎，明唔明？叫我做「資深傳媒人」貼切啲！
前日本欄標題《外判行貨洗牙》，哈，又再次引起頗大迴響，一個上午已過十萬人在社交平台上瀏覽，相信應是焫著不少退休/現任公務員及家眷感受啩。
負評怒氣狂鬧的，無謂複述了，講吓過癮回應有幾大開眼界。
一、記住，外判洗牙，要精明選區呀！簡單道理，舊區牙醫診所，做平民生意，意即你只可得到草根式服務。碌Sir，教你吖，下次用政府外判，一於選由中環到南區牙醫診所啦，佢哋做慣有錢人生意，故此，由地方到服務，唔會差得去邊。你第二次在旺角甲級中心，已發覺明顯比紅磡舊地舖好，就是這個道理。
二、碌Sir，你身嬌肉貴，做乜去政府外判洗牙呀？我去開嗰間，洗足半個鐘，棚牙白雪雪，好平咋，牙齒衛生員洗，千七蚊，醫生洗，三千有找，物有所值呀（原來小弟讀者咁多大富豪，仲以為我與佢哋同一個生活水平，真真大誤會）。
三、碌Sir，我去開嗰間，好似入咗「大富豪」夜總會，一號醫生HKU畢業，一千蚊次；其他三位菲律賓大學畢業，只收六百，你估我選邊個呢？