誰應放張學友一馬？難盡數，當然包括幕後靠張學友「發達」的利益持份者，計有經理人、唱片公司、音樂會投資者、製作人、歌迷，甚至可能是學友的家人
最最最重要，牛唔飲水點撳得牛頭低，當然是張學友自己！
學友幾多歲？64，正正式式長者了。冇人是超人，尤其站在舞台上，晚晚四小時，個個都可估計到要支出幾多體能及腎上腺素，才可頂一場演出。
小弟有幸睇住學友當年贏得《十八區業餘歌唱比賽》冠軍，其時佢風華正茂，青春無敵，體能巔峰，歌藝出眾，火速成萬人迷，理所當然。
不過，既然花想百日紅，自然壓力隨之而來，經理人陳自強不斷安排工作（催谷？）下，歌影齊來，很快已見佢情緒爆煲，晚晚狂灌拔蘭地，我在場目睹幾次，直接見到佢失控找發洩，繼而出現掟蛋糕的經典場面。
偶像其實也只是個普通人，體能有限，若要玩長 ，就要有如跑馬拉松，掌握節奏，保留實力慢慢跑，應快則快，應慢則慢。
但不知何解，學友很早已經狂開演唱會，可以去到一年100場，然後2016年至2019年，接下233場，當時已超過50歲。踏入60歲，更瘋狂，不知是誰做的決定（當然佢自己有份），2023年至2026年，決定全球做302場，是否很令人震驚？
是舞台魔力？是經濟需要？還是有其他理由要去到咁盡？
終於近兩年，一次又一次聽到佢臨場頂唔順取消演出的消息，其實這並非新聞，絕對是可以預見的。
剛剛周日晚在東莞演出，又幾乎 低，中途失聲，因聲帶不再受控制，這證明是聲帶已發出最嚴重的抗議，你唔停我停！張學友，你可否放自己身體一馬呢？
