曾智華
今期暑假，作為影迷，小弟好冇癮，純粹個人口味，對荷里活英雄片、卡通片、恐怖片，一律冇興趣。終於等到上周的《神探零零甩》，為捧里安納遜火速入場，結果冇晒癮，偶像墮落到玩低品味屎尿屁，頂\u5497三十分鐘起身走人。
今期上的《長安的荔枝》，本冇乜入場意欲，因單睇片名，唔知佢搞乜，加上內地片，事實，多多少少有點抗拒。不過，影癡老友個個睇過個個讚，加上咦，原來乃我欣賞的演員大鵬負責編、導、演，即此片靈魂是也，好，又入場。
開始關注大鵬，乃因佢在早年《第八個嫌疑人》的超班演出，第一次見識這位天才演員，今次《長安的荔枝》更見其駕馭電影的級數。
此片在內地先而電視劇，繼而電影，皆大受歡迎，因替無權無勇小人物出了一口氣，尤其諷刺平民百姓遇上官僚的無奈（各個部門卸責交波，香港不少申請過食物或其他牌照小商人，必有共鳴），以及批判極權人物（以昔日帝主作比喻）的奢華及不理民情。
故事背景為唐朝天寶年間，一位平庸怕事等退休的小官李善德（名字已有隱喻），被指派一項「不可能的任務」，從嶺南運送新鮮荔枝到長安，供楊貴妃在誕辰日品嚐。
點解這是「不可能任務」？因荔枝保鮮期極短，一日色變，兩日香變，三日味變。嶺南至長安，路途遙遠，氣溫不定，荔枝經長途跋涉必壞掉，故個個大官拒絕接此任務，硬屈李善德接波，即等佢去死。
民間喜劇，拍來瓣瓣高章，包括攝影、布景、化妝、特技\u22ef\u22ef當然，大鵬的導技與演技，也再次令人眼前一亮，電影全材也，能以嫻熟技法炮製一套A級之作。
誠意推薦入場，肯定不會中途拜拜。
