（曾智華）
緣份，好難甚至冇得解釋。總之有就是有，冇就是冇。有的非常有，有的普通有。有的初時有，後來冇；有的則是初時冇，後來有，來無蹤，去無跡。
這個不單發生在初戀男女，連同學、同事、鄰居、親戚、死黨\u22ef\u22ef甚至朝朝早餐茶記的不同侍應，到街邊賣菜賣肉的檔主，也無不如是。
與有緣的人相處，特別快樂；與無緣的人「被逼」相處，非常冇癮又痛苦。所以，當你有得揀時，一定要將操控權牢牢握在自己手中，因與有緣的人相處，如魚得水，這種感覺直接影響身心健康。
不過，人在江湖總有職業需要，當你必須要日日與大量完全無緣的上司下屬相處，又或與憎厭的客戶相對，此時就要用「專業態度」應付，調校自己心態去忍一忍，下班時才大解放。
老友，你份人工包埋與無緣人相處\u35ce，知冇？
小弟又如何？退休一秒開始，立即按掣將無緣的人在關係網中全刪除，再由零開始，在自己掌控下，重新認識同聲同氣同興趣同價值觀的新朋友。
好多人錯覺，喂，60歲仲點認識到誠意相交的朋友呀？係真唔係真？我的親身實驗——唔係真！問題是你有冇找到適當對象後，再先行一步——交心，老老實實坦誠建立感情。
今日講緣份，因馬圈也是個緣份的天空。最近人人一講起「文妮緣份」就笑晒口，因練馬師文家良與見習女騎師黃寶妮的緣份，真是好到你唔信。小妮子頻頻贏馬，贏的並非來自師傅賀賢，竟有一半來自文廄，服未？我有一馬友就專追這對「有緣人」，結果贏到食法國大餐。
今晚第七場「安康萬里」好似冇得輸，但我睇兩位土炮騎的「樂勝天下」及「風暴之子」，可以篤爆佢！
