曾智華
馬季及波季開始進入高潮，幕後人盤算「去」或「唔去」，也要部署得精準，以達最大終極效果。
馬與波皆是體育運動，也是大型賭博，故此，兩者的特質皆有齊。
體育，基本上當然優勝劣敗。豬冇可能贏馬，五班馬實力與一班分野懸殊，根本冇得跑，所以，任你造假，也不能違反自然。
賭博又如何？幕後人當然擇肥而噬。尤其跑馬，點會場場去？香港千幾匹馬，只得一隻「嘉應高昇」如此，咪儍啦。
呢呢，其實波與馬點解會令全球十億計人著迷，正因千變萬化，大家在鬥智。下注者，最喜歡估你去或唔去。
馬唔去，有N種原因，例如未Fit、途程唔啱、對手太強、賠率不合、另有目標、正在減分、聲東擊西……
記住，唔去與去唔到，乃兩回事，資深馬迷一睇巡邏影片，就會理解。
足球同理，也會有去與唔去。但唔去的機會，遠比跑馬少，尤其面對超級聯賽及天文數字的國際大賽，死一次都唔掂。
咁幾時會唔去呢？兩個情況：一、唔去會贏大錢，一場已夠球隊出幾個月糧；二、超強隊要面對N咁多本土及國際賽事，必須保留球隊實力應付大賽。故此，無關痛癢的「盃仔」，都會放棄，一於爆冷贏錢再唔去，以留力。
呢呢，10月開始，歐洲就有多個「盃仔賽」開打，若你係阿仙奴、曼城、拜仁、皇馬、巴塞、些路迪、巴黎聖日耳門……會否費力走去博？有冇咁蠢呀？所以，精明下注者，定必吼班大帝幾時「唔去」，上周阿仙奴已經「表演」咗一次喇！
今晚快活谷賽事，你咪問我邊隻唔去，我只估邊隻去，五班一千米，「馬運高」、「辣得金」、「颷誌」及「洛河」互穿啦。