曾智華
哈哈哈，明天馬季開鑼，你想唔想旗開得勝呀？一定想啦吓嘛，咁就易，用10蚊雞搞掂，一於買世界馬王「嘉應高昇」位置啦。
馬會條例規定，凡出賽馬，無論幾熱，W或P都要派彩，貼錢都要派。故此，「嘉應高昇」凡出賽，馬會就要蝕本千萬元計。喂，咁你攞唔攞呀？
一般馬迷當然嗤之以鼻，邊會攞？但也有不少人純攞個意頭，有個好開始！
我又如何？十蚊雞買P就唔會喇，反正又係晨操咁款返嚟，咁就買二重彩佢行頭，再補Q喇。用佢拖邊隻，開閘前先決定，總之次熱三熱唔要，反正拖中都得啖笑。咁就拖其餘三隻，共60蚊，中就有兩條飛，有少少肉食吓啩。
近日不停被老友問：「碌Sir，你今季捧邊個騎練呀？」
唔使講，當然甘敏斯啦，佢正式龍過江，背景非常顯赫，香港冇個練馬師夠佢勁！由曾祖父開始，已經橫掃澳洲馬壇，再到祖父、父親，全部一級大賽頒獎台常客，而佢則以36歲之齡，已贏得五十項一級賽，兼至今勝出一千五百場頭馬，如此猛料，究竟為乜落戶香港？香港政府是否走晒大雞，唔識大鑼大鼓宣傳呢？
季初買甘廄馬，易，因招牌大過天，有飛的一定去，唔會蠱蠱惑惑；冇飛，則唔使買，一如桂福特初來時一樣，為表光明正大，公開聲明：「我啲馬，冇飛的等於未Ready！」
好嘞，騎師又如何？「華人一哥」周俊樂肯定會更上一層樓，因佢騎馬用腦，不單死跟指示，故上季已顯光芒。
外籍的，就要買Mr. Bean艾兆禮喇，佢騎功一流，勝在熱熱都仍有得分。另外，若非級制賽，唔使理巴度及布文，兩丁友眼中只有個Dollar Sign㗎。