曾智華
開季已經三個月，睇睇練馬師榜，特別替兩位擔心，正是丁冠豪與葉楚航。兩皆仍然未開齋，W食零蛋，尤其葉廄，擁有成五十三匹馬，好難交代。
2012年馬季，葉楚航曾以六十九場頭馬壓倒告東尼，成為冠軍練馬師，那時意氣風發，在馬匹亮相圈舞大旗，好不威風，乃五屆冠軍練馬師簡炳墀最得意弟子。豈料⋯⋯究竟發生乜事，今季如此當黑？
更冇癮，原本擁有的2023年打吡冠軍「大至尊」，被拉倉後，在羅富全手中再度回春W出，真真眼眉都剃到乾乾淨淨。
再強調，馬圈乃英雄地，冇表現，必定無情講，馬主立即拉倉！
更不堪的是，師兄弟丁冠豪僅得三十五匹馬，竟表現仍好過佢，起碼四場有Q。
簡炳墀在天相信次次會睇跑馬，見到徒弟仔表現如此不濟，會否谷鬼氣冇眼睇，或是倒轉，發功報夢教兩丁友仔點練馬呢？
「牙擦簡」乃五屆冠軍練馬師，絕招甚多，點都應該過多兩招救救徒弟吖！
今日沙田有場頂班二級賽「沙田錦標」，「白鷺金剛」報名後退出，廄侶「祝願」有機會成大熱。
素來高班讓磅賽皆屬爆冷溫床，今次應該不例外。兩隻頂磅馬「遨遊氣泡」及「祝願」皆孭一百三十磅以上，搏盡相當不智，理應留力跑餘下的平磅賽，機會高好多。
呢場6歲或以上老馬八隻，面對三隻5歲對手，全部分數仍在上升中，唔易一一過關。
呢場我最喜歡讓磅賽專家巴度的「首飾天空」，上場千四米勁勢W出，有餘未盡，今次孭少十九磅，輕飄飄呀！對手為上場G3跑千四米獲P的「紫荊盛勢」，呢匹上季打吡入位馬，流鼻血後經已養回，機會馬。第三勢力「光年魅力」，經已在試閘中磨利。