今個馬季容乜易旗開得勝吖，開鑼日世界馬王「嘉應高昇」在陣，「行」返嚟都贏。體育運動講級數、講卡士，你唔係嗰皮，就根本冇得贏，「豬」又點同馬跑？結果馬會又派錢。
小弟雖然大大聲講投注，但實則長年每注只十蚊雞。今次破例掟一百蚊落去，執五蚊，足夠到七仔買豆漿。
開鑼日令人有點擔憂，因馬迷餓咗成個暑假，理應一開波就「踴躍捐輸」的。但反高潮，投注額在跑足十二場情況下，竟下跌7.12%，這個幅度絕不尋常，馬會管理層必須認真查找原因。
幸而壞消息外，又有好消息，正是遊客入場大增，較上季升74%。不過，事情兩邊睇，比較遊客，本地客開鑼日入場，則明顯下跌了。
以上走勢，不可繼續，因跑馬到底是本土盛事，我哋當然歡迎遊客，但總不成搞搞吓變遊客多過香港馬迷，這絕不健康。
小弟開鑼前明刀明槍指今季騎師會捧艾兆禮，因騎功好、分頭高，相對潘頓騎功雖好，但冇得分，少少智慧都知取捨。結果開鑼日即見真章，騎師王開盤，潘頓1.13倍，恍似99%必勝，因佢騎足十場，大把子彈在手。
艾兆禮又如何？開盤18倍，只騎七隻。
結果，投注潘頓者嚇到鼻哥窿冇肉，因跑到第九場，仍畀艾兆禮咬住唔放，雖最後僅勝，但贏咗都係得個桔，兼勁食驚風散。
今晚跑快活谷，我點睇？首先唔睇方仔馬房，上季已出盡飲奶力，要唞唞。
改捧沉咗一輪的伍鵬志，三隻皆排好檔，剛戰與袁幸堯攜手勝出，今晚再合作兩隻，包括降班的「藍地球」及初跑谷草的「應龍飛影」。另一匹為何澤堯的「長勝隊長」。
咁就每隻十蚊WP，再P三串四，一百蚊投注，睇睇有冇消夜食。