曾智華
睇今日標題，你會否以為我黐咗線呢？
當然冇，只是上周日賽馬，本欄畀三隻貼士，結果就頭二三咁返嚟，小弟一邊睇佢哋衝線，一邊情不自禁，個腦突然跳出隻兒歌，正是——Do-Re-Mi，飛機師！
「嘉應奇兵」、「興馳千里」、「扶搖勢勁」，最冷一匹W，結果贏夠當晚全家食Pizza！
今期繼續講點解投注額會縮呀縮。我不停走訪馬迷做調查，結果如下：
一、直播賽馬節目悶到飛起。官台主持窒住窒住，慌死畀人炒魷，絕不敢講「接近紅線」意見，有如傳統公務員——不做不錯，佢哋就「不講不錯」，根本冇看頭，怎能刺激收視及投注欲？其實網上幾個私人頻道主持講得精彩吸引，但冇馬會直播片，嘥料。且看馬會領導人可有胸襟（或膽識？），接受有挑戰聲音節目，主動放出直播片，如此，成本冇變，但賽馬吸引力卻大大增加。
二、競賽小組擺明放生大騎師。尤其最勁的「軟硬鞭」，任佢玩，喜歡去就去、縮就縮。一如球賽，球證偏幫，球迷自然噓爆離場。
三、騎師勢力長期失衡。馬會必須引入全球高手，長期或輪流客串也好，針對性打散如今的歸邊勢力，讓賽事具競爭性。
四、馬迷長期覺得被「打劫」。點解咁多「神仙」，識得在入閘後才幾百萬元、幾千萬元落注？錢邊度嚟，馬會保安部有冇徹查？「聰明錢」在黑，馬迷在光，點玩？
唔搞掂以上幾點，投注額必繼續縮！
今晚快活谷第六場二班跑千八米，告仔出三匹，「加州動員」是主力，用佢拖「極光之子」及「喜蓮勇感」，買Q、PQ及二重彩啦。
記住，小弟貼士符符碌碌，不會次次中，咪Sleep On It呀！