上周日跑大賽，小弟真係開心死，並非贏 天文數字派彩，而是上周六本欄標題大喝一聲：《老麥快 起身開工》！
哈！佢竟然聽話，立時由之前出賽十九場，頭馬食白果，搖身一變，變回世界No.1騎師，呢丁麥道朗，原來是超級「軟硬鞭」，比潘頓更勁。
跑十場，三W一Q兩P一第四，服唔服？
當日下午四點開始，我手機已不停彈出多口老友訊息：「碌Sir，原來老麥係你隻『馬』喎，叫佢開工就開工，中好多啦。」
對，中 好多場，最勁一場為「錶之銀河」二重彩拖杜苑欣隻「陽光勇士」， ，派1,174元，難以想像，皆因「祝願」瓜直。
老友，記住，老麥唔會日日開工 ，身驕肉貴兼不一定在香港贏馬才賺大錢 ，所以，適當時間又會遊馬河 喇。
上周日另一令人欣喜的騎師為長期發霉的巫顯東，騎「天將龍駒」再大熱橫掃。
此子長期冇馬騎，當日也只得一匹，咁就出一匹W一匹。老友，跑二千米，同場猛將如雲，竟可淡淡定定一條直路殺晒，心理質素差 都唔掂 ，各位練馬師多 畀機會佢啦。
大佬呀，連未開齋的水蛋騎師潘大衛，今季都出賽八十三次，東仔有乜理由只得二十三次上陣機會？若我有馬，一定畀佢騎。
今晚快活谷，小弟專事研究田泰安及杜苑欣，兩皆在上周日W食白果，睇牌面，今次應有馬贏。
最好睇第七場，田雞隻「奮鬥輝煌」排好位，上次第四，今次必入三甲。對手是杜苑欣隻「祥勝將軍」，此馬上陣十四次仍未W，今季踏入4歲，開始成熟，上兩場連水蛋騎師潘大衛執韁都剷入第二及第三，今次換上英國一級騎師，絕不古古怪怪的甜姐兒，應該W得 。
