陳蕾今日（21日）推出全新歌曲《空無之地》，繼續親自包辦曲詞。「空無之地」一詞來自一本名為《每一天，都是放手的練習》的書，意思是當人離開舒適圈、失去了本來屬於自己的東西後，所進入的一個「一無所有」而使人不安的境地，但陳蕾認為「空無之地」並不絕望，人反而要「無」，才會使自己日後擁有更多，要「放下」手上的東西，才可以用這雙手創造更多可能性。
被新歌歌詞感動
陳蕾分享道：「『空無』就咁聽落好似好悲傷、負面，但其實換個角度睇，可以係一個好好嘅機會俾你做任何嘅嘗試、做任何嘅開創，我就俾呢個感覺深深感動到，寫到後半段嘅歌詞，所以呢首歌對我嚟講一路寫已經係有無限嘅感動湧現出嚟，可能係我寫過最感動到自己嘅一隻歌！」更坦言：「就好似歌詞入面其中一句『能夠放下便徒手 接萬有』！呢隻歌亦都成為我人生除咗《相信一切是最好的安排》之外，另一首好重要地支撐住我每一個階段嘅歌！」
後悔未有帶齊保暖衣物
為配合歌曲意境，今次團隊特意到東京富士山拍MV，全身黑色簡潔造型的陳蕾漫無目的地遊走於看似無盡頭的荒廢隧道、極簡水泥牆壁空間，更躺於富士山黑色泥土上，畫面盡現萬物虛無的感覺，畫面背後陳蕾可謂歷盡艱辛，更險於富士山因失溫暈倒！陳蕾說︰「今次去日本其實係要四日連拍三首歌嘅MV，同埋嚟緊預計喺年尾就會推出個人大碟入面嘅相，所以其實每一日都好唔夠瞓，再加上每日都要好早就化妝同埋要跑唔同地點嘅拍攝，拍呢首歌嘅MV嗰日，室外嘅天氣係好熱，講緊如果喺陽光底下我着嘅嗰套衫其實都會流汗嗰種，但係一去到隧道係凍到極度需要有件羽絨笠住，我之前喺香港仲係度諗，夏天有時拍室內都覺得熱，唔洗帶保暖嘅衫去啦，點知去到就好後悔啦！一冷一熱加上又唔夠瞓，拍咗第一個鏡頭已經低血糖，我啲同事驚我真係暈係富士山，一cut機就瘋狂咁畀我食嘢、狂食朱古力，最後我係直情瞓咗係富士山嘅泥地上面差唔多20分鐘，啲血糖先慢慢開始升返上嚟，先至可以正常拍攝。」
