香港零售業及傳統中式飲食業進入冰河期，真係謝過「謝老四」（老香港必知此形容）。不過，雞死雞鳴，香港大學事業（好有商業意味）則真係發到 聲，撳都撳唔住咁爆升。
點解科技大學工商管理學院可以一 掟三億幾元，買下金鐘名都酒樓？無他，因學生多到爆晒棚，自然唔夠課室及宿舍，故此，睇走勢，香港冇乜客路的中型酒店，今次發達 ，唔使好似商廈及街舖咁頭痕。
報讀科技大學MBA學位收幾錢？盛惠一百五十萬元。一個一百五十萬元，十個一千五百萬元，一百個一億五千萬元，咁 收幾百個就 係咪正到飛起呢？
輕易畀得出一百五十萬元的，當然早已是業內成功人士啦，難得仍有鬥志再增值，畢業後就肯定更上一層樓矣。
昨晚遇上著名MBA大教授，玩玩佢：「嘩，百五萬上你兩年堂，分分鐘聽一課要萬幾二萬蚊喎，咁我成日同你食飯聽你講 ，咪等於次次塞萬幾蚊入我袋？」
講返正經，外來學生湧入香港，當然大部分屬內地生，個個平時只講普通話，故多數英語水平一般。
教授話：「香港乃國際城市，大學也是國際級，所以，必須堅持用英語授課，這條線，絕對不可妥協，否則就變 『內地大學』。」
教授的睇法，未必整個香港大學界認同，但小弟百分百支持。小弟以前到美國留學，初期也是窒口窒舌，但只要有決心，必能慢慢掌握基本溝通技巧，繼而去到大學水平。事實，到外國留學，其中一個目的，就是想英語更流利。難道去美國學中文咩？
另外，香港為維持特色，也可鼓吹內地生校園內多用廣東話，大忌香港學生改講普通話去遷就，因為——This is Hong Kong！
