頂唔順乜？頂唔順今期上映的「猛片」《神探零零甩》。
本來單睇片名已知肯定騎呢，不過，小弟多年來屬里安尼遜擁躉，喜歡佢銀幕上「地球最強爸爸」形象，正氣正義，嫉惡如仇，為保護家人義無反顧出生入死 故此，里安電影套套上畫我套套睇，就似五十年前的黃飛鴻系列，無一錯過，汁都撈埋。
不過，呢套又如何？慘情，一邊睇，一邊自言自語問點解佢要搞成咁呀。
滿腦子疑惑，為乜佢要臨尾打爛齋缽，接套騎呢戲，扮個無聊角色，真冇癮，在我心目中，佢先前的英明神武形象，立即消失大半。
先旨聲明，我對王晶無大偏見，一如許鞍華指出，王晶戲雖然水準不高兼代表屎尿屁，不過，佢在最多產的日子，的確為影圈帶來重大貢獻——人人有工開。
王晶戲有佢自己「風格」，影星們接拍前應該知道，所以，接受又肯玩Cheap 才好接，否則賺一次片酬而影響形象，絕對不值。
講返《神探零零甩》，里安正正扮演一個騎呢到爆警察，戲內大玩屎尿屁，可能編劇及導演覺得咁好好笑 ，但我就唧都笑唔出。
尤其開場一幕打劫銀行，里安竟著裙刻意露出花底褲，要幾Bad Taste有幾Bad Taste。
其實個別明星形象確定後，絕對不宜亂改。你話 ，早年的關德興，若變 陳百祥又或周星馳，會點？同理，奇連伊士活走去搞爛Gag，你話佢班數十年忠心粉絲幾心碎。
講完啦，我真係頂唔順片中的「零零甩」，因覺偶像形象破滅，頂左30分鐘決定離場！
另外，娛樂新聞話里安與女主角彭美拉安德遜真撻著，就此片看，佢 口味的確有點 …
