曾智華
資深馬迷的老經驗——馬圈，乃一個輪流搵食的圈子，當然前提是你要有實力。
騎師、練馬師皆如是，有實力，就有牙力。今次你去，下次你避，大家有晒默契，跟住劇本演繹。
冇乜真定假，反正任何圈子都不可能一家獨大，你睇國際大舞台，美國本想霸晒，但玩玩吓都識「讓路」畀中國，以便齊齊有得玩。
再講一次，前提係你手瓜有幾硬？
上周專欄，小弟表示非常好奇，強如周俊樂，點解竟會一連幾個賽馬日食白果咁肉酸，唔合理喎！終於上周日劇本揭開——因未輪到佢威呀！
一旦輪到，立即「馬神」上身，一晚之內二W一Q二P兩第四，七場之內，冇佢冇四重彩！
連「騎師王」都殺埋，我當然會心微笑，尤其去到尾場，「軟硬鞭」騎大熱、來自游廄的「紫荊傳令」，廣東話形容「之之咗咗」跑第三。而當晚樂仔兩W皆來自游廄，突然尾場改騎呂廄。
大家睇睇巡邏影片，樂仔與潘頓騎法，就知乜叫劇本嘞！明就明，唔明搵黎明。
明日主菜是「慶典盃」，三級賽，讓磅，有幾隻明星馬，唯獨冇咗「嘉應高昇」。
咁即係點？即係若「驕陽明駒」唔趁剋星不在，執返一場W，咪蠢過豬頭？隻馬去季一場W都冇，完全冇道理。不過咁，此馬已7歲，今次非嫡系騎師布文執韁，存有疑點。
「白鷺金剛」霍宏聲有機會再騎，當然搏命，唔使懷疑鬥志。
「小鳥天堂」為丁冠豪唯一馬王級鎮倉之寶，潘頓騎六次四W一P，丁廄已經冇乜馬，有機會唔去？再被拉倉就成個馬房散晒喇。
呢場W，在以上三隻選擇。
讓賽必有一隻少少冷，應該係「合夥奔馳」嘞，剛賽熱身有表現，有權入Q㗎。