大人物最怕在大場合失聲，好像特朗普的天王級領導，忽然興起打電話找在開大會的黃仁勳，吩咐讓出演講時間給他發言五分鐘，弊，黃老闆冷不提防之下手忙腳亂，一邊解鎖手機密碼，一邊要駁入台上擴音器，結果搞了十幾秒，才成功讓總統在會場「暢所欲言」。大家知道總統以前係《飛黃騰達》節目主持，若參加者台上講嘢結結巴巴，阻住地球轉，特朗普下一句就係：「You’re fired！」
當然，黃老闆都係老闆，是十大首富之一，炒佢，你玩得起咩？果然不愧美國總統，玩你就玩你，特朗普隨即在電話中幽黃老闆一默，「你研發出世界上最複雜的晶片，而且領先世界十年，點解搞唔掂你部手機？」引發全場哄堂大笑。
可憐黃老闆個心離一離，你咁玩法，有可能連累英偉達股價，使唔使呀？但從另一個角度，總統好不滿，下次唔該醒啲，拜託。
蘋果教主喬布斯是緊張大師，須知道，幾十年前電腦時不時死火，教主領教過，被逼台上Dead Air，面懵懵企響度。經過嚴密計算，從此每次上台帶足三部電腦，這是結合工程學與危機管理中的機制︰主用機（A機）進行演示，另一台B機與A機完全同步。一旦A機在演示途中當機，後台技術人員可在幾秒鐘直接將畫面切換到B機，台下觀眾幾乎不察覺異狀。如果A、B兩台電腦同時損壞，C機作為最後的防線，立刻插電頂替出場。
黃老闆下次需要帶夠三部手機防身，唔好怕麻煩。