曾智華
今日，自己要重提我一條四年前的YouTube片，希望幫得一個得一個。乃因上周日圓被美國人為地一夾而一日之內「暴升」，可能令好多散戶中招。
美國佬出手，當然冇死錯人，邊會咁好死救日圓？起因當然是日本乃全球揸美國國債最重的國家，若佢唔掂，必定火燒連環船。故此，美國要頂住日本唔好沽美債救日圓，出手純為自己「金融安全」。
技術上一匹布咁長，唔講住，只想講返日圓有冇得救。
回說四年前，有一對年輕人開創了「30歲財務自由」頻道，邀請我講日圓前景。當時小弟反應：「30歲財務自由？係咪發緊白日夢？」但也好奇去同佢倆傾傾。
發覺有紋有路，的確由做補習社生意積累到相當多財富，於是準備進軍其他領域。
好，又替佢哋講一次日圓。之前，當然做足研究與分析，發覺大鑊！結論是日圓跌到兌六算都咪買，因根本睇唔到有翻身機會。
粗淺幾個原因：
一、日本乃負債最多國家，比美國更勁。國債之重，邊個政府上場都無法解決危機。弊在又唔似美國可以亂印銀紙兼用霸權恐嚇其他國家賣帳。所以，日本根本無條件加息，故長期零息。於是，全世界炒家就睇死日圓無得升，借盡去改存美元收高息，呢條「橋」簡單又「必賺」，日圓怎不繼續跌？班炒家賺日圓貶值再加美元高息，肥到著唔到襪。
二、日本近年幾乎所有領域都鬥輸畀人，以前出口威威的汽車、電器、科技產品⋯⋯以至百貨，無一再領先世界。
三、獨沽一味賺外匯的旅遊，也因與中國交惡而面對陰乾。
四、冇新人口又拒絕外人，整個國家欠新血。
一言難盡，總之可見將來日圓都冇前途。