男性喜歡鬥，天生的，唔好問點解。所以，最佳是做運動員，在體育場上公平競爭，唔掂，再苦練，「擂台再見」。
鬥叻，最常見在投資或賭博領域（其實十之八九輸到趴街）。鬥慘又如何？一樣鬥餐懵，尤其上咗年紀，不少比併⋯⋯慘。
「吓，你要食三種血壓藥，三高糖尿又抑鬱？最近驗埋前列腺指數直逼曾國衛？唉⋯⋯我更大鑊呀，上周急性膀胱炎痛到黐肺，立即入院割，驗血時，發覺好多不尋常跡象，唔知會否危及命仔，要不停驗呀驗，好彩買咗保險！」
以上對話，是否熟口熟面？
過去兩周，小弟隻中風右眼因後腦跌倒撼地，搞到眼球充血，即時失明，要急急做手術放血，割白內障及用激光補窿。
寫咗出來後，好事不出門，慘事傳千里。各方老友奔走相告，茶餘飯後冇嘢講就話：「聽講肥碌幾乎盲咗，要沽股票去救噃。」
係咪好有吸引力呢？一傳十，十傳百，百傳千千萬萬，再透過社交網站散勻全球有香港人的地方，搞到加拿大及英國的親友急急問候，當然，勸多兩句：「叫你唔好飲咁多酒㗎啦！」
其實唔知點解非酒徒者，覺得乜都關酒事的，小弟都懶得辯論。
我其實少少慘，但昨晚飯局，有人與我玩鬥慘，正是S博士，突然掀起T恤，嘩嘩，一條大蛇似的疤痕暴現，哎吔，肯定好慘嘞。
「肥碌，你幾乎盲咗，我則痛到冇命呀！」
原來早前一晚，S兄突腹部痛到癲，唔敢去公院輪急症，改飛車去最貴私家醫院。
名醫斷症，急性膽炎，要立即開刀。因S博士長期食薄血藥，不可用微創，只能用傳統劏肚。呢一刀，荷包事小，冇咗二十幾萬元啫，但連續幾晚痛到典床典蓆呀！聽落，好似佢慘啲喎！