上周講到再變「獨眼龍」，醫生指示，必須盡快下決定施手術。
施手術，在私家醫院，要Book醫生、手術室、麻醉師、床位⋯⋯加埋其他雜費，喂，你話做就做，可能係黑洞㗎，故此，先要理解自己能否負擔先，否則，就要考慮去公家眼科醫院「衝急症室」或輪個天長地久，再要睇睇收唔收。
但眼睛乃人體之中非常重要器官，只要經濟頂得住，當然去馬，以免拖出其他併發症。
計吓條數，咬咬牙，一於住大房，加埋加埋幾重錘吓，要放部分股票先掂，總之，去馬！
一聲去馬，眼科中心護士立即做齊準備工作，先Book呢樣嗰樣，結果，確認翌日晚上手術室有期。然後一再逐項介紹支出的項目及費用，另外，手術冇百分百，超時又會如何⋯⋯
OK後，到會計部交訂金（正常又應該，否則若你改變心意，邊個填氹？），放下的支票，聲明除非你突打退堂鼓，否則不會過數。
萬事俱備，護士姐姐揸一大疊類似「生死狀」文件，引領到一間獨立房，逐一解釋，再請你簽名確認。
老友，咁大疊，你根本不可能讀勻，更遑論內有不少專業醫學名詞，我識鬼咩。
選擇一個字——信。信醫生的醫德及專業（早早相識，又有感情），故揮筆簽呀簽。
到最後，護士又畀兩張「手術可能引致的風險」文件，請我帶回家慢慢睇。
一睇幾乎想笑。因令我諗起十一年前的一幕，正是醫生打特效藥入我的眼前，先宣讀「可能發生的一切」，一讀一驚心，包括打到變失明、爆血管、視網膜脫落⋯⋯總之有可能的最嚴重情況，先旨聲明。
「醫生，若你係我，打唔打？」「當然打，根本絕少發生，但我有責任讀，你有責任知！」