(曾智華)
有啲嘢，真係話嚟就嚟，全無預警。
十一年前，瞓瞓吓覺，凌晨起床去殊殊，突然覺得右眼湧出烏雲，唔知係乜，冇痛楚，繼續瞓。翌日問熟悉眼科的老友，急急指示：「立即就醫，可以好大鑊。」
呢個時候，當然唔可以去輪公家，速速搵私家眼科權威，一錘定症——眼中風，起因為血壓高而無服食適當劑量藥物控制。
打咗一個療程特效藥，控制住，定期到眼科醫院覆診，當然，乖乖每日服醫生指示指定血壓藥劑量，不再儍吓儍吓自己減藥。
十一年相安無事過去，豈料又係嘞，話嚟就嚟。前日起床，咦，乜咁怪，右邊曾經中風眼睛望出去，有N咁多微小血點，十分鐘後，視線冇晒，只有一張白幕。
但與早年一樣，唔痛，只係「失明」！
速速再搵當年的權威醫生檢驗，又再定性，眼球內充滿血，必須先清，再查找原因。
「醫生，點解從外形看，眼睛好似好正常的呢？」
「若果表面布滿紅絲反而不太嚴重，如今你隻眼外邊睇完全冇事，即內裏有事，更麻煩。」
做咗N個測試，結論：「曾先生，盡快做手術，先清瘀血，搞清眼眶之內有甚麼問題，包括視網膜⋯⋯然後，再割埋白內障。你有冇買保險？」
小弟買咗醫保六、七年，因一個仙都未Claim過，對一切條文及乜會保、乜唔保，完全一嚿雲。但一嚿雲還一嚿雲，難道唔做手術？
於是問：「究竟幾時做最好呢？」
醫生嚴肅講：「即刻做最好，明天啦，要快，手術室唔易Book，兼且也要找麻醉師！」
此文見報時，小弟應已經成條「獨眼龍」咁款，瞓在醫院病床。究竟我右眼中咗幾多問題，又有幾嚴重（包括我荷包）呢？且聽下回分解啦。