黃秉華
個頭蓬鬆，拎一個環保膠袋，似拾荒者多過鬥牛勇士，吓哇？錯，西班牙世界盃正選球員古古列拿，由於太有喜感了，結果成為網紅，我敢說，在內地紅過美斯。
「簡直離譜，身為大國球員，你咁唔Like，做乜嘢上台攞獎啫，你唔去學日本體育迷，上觀眾席撿垃圾啦，橫豎你隨身攜帶透明膠袋。」此刻我感到有低氣壓，不過，席間都是我的老友，我點講好呢？阿根廷球王嘅忠實擁躉又有，日本足球小將嘅Fans又有，唔通又係叫大家「食個包」打破悶局？
好啦，不如大家講吓國際足協主席恩芬天奴，人哋幾有本事吖，晨咁早頒定一個國際足協首屆和平獎予美國總統，聽講話特朗普投桃報李，話下屆聯合國秘書長最好由佢做，係唔係㗎啫？
「老友，特朗普喺聯合國話得事咩？你當中俄兩大五常冇到，仲有美國交咗聯合國會費未先？」唔對路，忘記此間有中國科技股捧場客，美國不時放負面消息吹熄中國科技那團火，明明大熱門股，跌到七彩。「仲有特朗普逢周末周日搞大龍鳳，下個禮拜個市就亂龍，我懷疑有人日頭喺白宮返工開會，晏晝就過料畀莊家代理人。」大哥，你唔好亂噏呀。
講吓講吓，我忽然覺得好亂，不，正確而言，世界原來好鬼亂，依家除咗飲茶食包，大家感恩之外，真係暫時搵唔到第二句說話。「其實美斯都有可能做聯合國副秘書長。」點解？特朗普賽前看好美斯，想佢「做低」西班牙囉。