曾智華
一般人幾時會揶揄一個目標人物「抵死」的呢？正是佢自己攞嚟衰不止，更陀衰全世界，然後，踏咗入浮泥，唔知點甩身。這時被佢搞到雞毛鴨血者，當然眾手一指——呢條友抵死！
今日我講邊個？正是民意支持跌穿窿的美國總統特朗普隻「大馬」——戰爭部長赫格塞斯。
介紹大家睇精彩好戲，正是呢位戰爭部長，周二樣衰衰出席國會議員參議院撥款委員會聽證會，「乞求」議員通過增加軍費打伊朗。
呢丁「型佬」去年上場時意氣風發，曾高調召晒所有五星上將訓話，窒到飛起，擺明水鬼升城隍，種下無盡仇恨。
而佢對異性及不同膚色者，擺明「另眼相看」，更對曾在戰爭中擁重大功績的星級將軍，不屑一顧，毫不尊重，上任後炒完一個又一個。
本來，若果佢英明神武戰績彪炳，能以功績服人，咁就算嘞，可惜佢打仗時只是小將一個，毫無戰爭常識與謀略，純因被「狂特」睇起，就坐咗上戰爭部長大位，點東點西，美國人尤其軍人眼中，乃典型狐假虎威下流人物。
呢丁友上到參議院，民主黨議員當然唔會同你客氣，鬼叫你有所求。於是輪流發炮，轟到赫格塞斯口窒窒灰頭土臉，毫無能力還擊。無他，成場美伊之戰發展至今，真係瘀爆又衰晒，唔知點收科。
議員問題吓吓中紅心，包括：
一、2月開戰，揚言幾日搞掂伊朗，如今點解衰成咁？二、你在3月揚言早已徹底摧毁（Obliterate）伊朗軍力，咁為乜打咗五個月，仍不停在犧牲美國士兵而束手無策？三、點解你不停要求加軍費？加到幾時？要嚟做乜？四、你成日話要摧毁伊朗核設施，究竟仲有乜板斧？
答到一口泡，因江郎才盡，抵死！