邊個中？我囉。但今日標題，並非要來「曬」，只是分享一項長期經驗，希望各位馬友讀者，有耐性跟進及長期研究。
上周六賽事，本欄貼士又再「中規中矩」，指出第四場頭馬只得兩匹有機會，正是「扶搖勢勁」及「興馳千裏」。但兩匹互穿冇肉食，亦不合「幕後搵食定律」。一季跑馬，有幾多場會開大熱Q，你知嗎？所以，應以上述兩匹馬做二重彩膽，各拖五隻，一百蚊落注。
果然，頭二名有A就冇B。A是「扶搖勢勁」，輕鬆勝出。B呢？「興馳千裏」潛水去了。入腳為十九倍的「巴基之勝」。就此，二重彩竟派二百五十九元，夠去豉油西餐廳鋸扒了。
我選中八十三倍二重彩的，是第九場，「利高八鬥」拖「龍文正道」，派八百三十三元。
點解小弟事先冇在此提供？因唔肯定！唔肯定乜？是鞍上人潘頓會出硬鞭定軟鞭。
潘頓一倍頂頭大熱去唔去，要到入閘前才見跡象。入閘前回飛，十之八九出軟鞭，反之則出硬鞭！當你肯定佢出硬鞭時，就可放心二重彩單式行頭，飛起二三四熱門，食全餐。因凡有頂頭大熱「去」，正常劇本，二三四熱當然縮，否則大家食乜？
但究竟邊隻冷門行二？外人無法知，只好食全餐。結果開巴度隻九十九倍的「龍文正道」。大家可翻睇巡邏影片，細心研究成場馬班大帝點跑，必定心領神會——哦⋯⋯原來係咁。
今晚跑快活谷，有一場好好睇而唔多好落注，正是玩世界盃最後八強概念的四班1650米賽事。形勢非常平均，理論上除「巴閉仔」外，隻隻都唔飛得。
套用前輩張福元話齋——都要勉強提供嘅。咁就「哥倫布」、「追風」、「好運年」及「準希望」穿Q及複式二重彩啦。