馬迷也是正常人，當然有鋤強扶弱之心，故此，周三第七場，當我見到「團結勇士」衝過終點勝出一刻，也起身拍掌歡呼。
對，我中，因以大熱「幸運糖」做二重彩複式膽拖幾隻，中到應。
但開心並不單因中到應，而是見到榜尾練馬師鄭俊偉終可畢業。說來奇怪，馬會規定練馬師需要十六W才達標，否則不會發牌。但，哈哈，發牌小組可能是先知，故早在老鄭未達標時，已超前公布佢有牌，等於一匹馬未過終點前已宣布W出，奇唔奇？
當日方廄雖冇主帥莫雷拉，仍贏一W兩P，至今馬會其實可以收返個練馬師宣傳，因為冇晒競爭氣氛喇，沈集成及廖康銘仲邊有得追吖？
講吓明日賽事，最高班的二班千二米，反高潮，只得七匹報名，意即不少高質馬已經提早收爐，留返下季才搏。七隻之中，有一匹世態炎涼馬，正是姚廄的「扶搖勢勁」。
點解話世態炎涼？因此馬出賽十次，有八次由金誠剛執韁，交出亮麗表現，全部跑千二米，得到三W四Q超級佳績，當然是人馬合拍才有此效果。
不過，慘情，上仗大熱倒灶，輸一次啫，咁就⋯⋯立即換人，可能是馬主或練馬師的意思，也可能是「撬馬王」潘頓趁你病攞你命，立即索騎，故明天改由「軟硬鞭」執韁，你話放咗幾擔心血落隻馬度的金誠剛，係咪喊得一句句？
呢場潘頓肯定會交貨，六匹對手，只得一匹有機鍊低佢，正是呂廄由楊明綸騎的「興馳千里」，質素非常高，八次出賽，竟掃下四W兩Q，全部由楊明綸經手，嫡系坐騎，上次跑第二都加三分，可知幾勁。
但若以上兩隻攜手回來冇得分，我會買二重彩單式，兩隻行頭拖其他五隻，睇佢點開。