明天賽馬，有場會相當精彩，正是第十場二班的千二米賽事，因有隻馬王級的「喜慶寶」在陣，今季出戰四次千二米，三次輕風送爽Easy Win，於是由五十二分急升至八十二分。上鋪第四次出賽，仍是大熱，但由何澤堯換上班德禮，咁就有個輸馬藉口，甩拖跑第四，但評磅員竟仍加佢一分，唔簡單，擺明輸在騎師發揮而非馬的實力，大家可返睇巡邏影片，冇理由唔入三甲嘅。
今次與「喜慶寶」對撼，為另一明星馬「扶搖勢勁」，今季出六次千二米，兩W四Q，戰績非常犀利，踏入全熟期，今次再睇佢表演。
另一隨時揭竿而起的馬，為桂福特的「威利金箭」。此駒養在希斯馬房時出過五次，一Q一P一第四，嚴格講，戰績不太差，但馬主仍不滿意，拉到桂廄。有此高質素4歲馬加盟，老桂當然不敢怠慢，第一仗即殺入P，今次可能「爆樽」！
舊馬方面，要加入研究「魔術控制」，巫偉傑安排佢不停跑，健康應該冇問題，今季已出十三次，如今仍報名，唔似玩玩吓。「魔術控制」上季令人眼前一亮，因曾兩戰G1，最高評一○八分。之後不停減分，到去年底跑千二米，曾在九十九分入Q，如今再降到八十七分，若下決心，絕對入位冇問題。
今場最怪一隻馬為告東尼的「美麗星晨」，部署可用四個字形容——古靈精怪。此馬出道後，以跑千四米及千六米最擅長，獲得兩W三Q兩P。
但今年3月，告仔突然安排佢跑長途，先而千八米輸一場，更離譜，走去跑二千米 ，結果大敗二十二個馬位包尾！5月再縮返千四米，又輸。今次，古怪，更縮到千二米，究竟搞乜？明天自有揭曉。今場以上五匹，買二重彩複式五蚊注！