黃秉華 說好中國故事
只要你敢想，敢想你就做得到——美國夢想——真人Show即將上演。
科技大亨馬斯克宣布計劃推動旗下SpaceX上市，有關傳聞已久，但無人可以事前準確估計這間太空公司市值多少，然而，SpaceX的故事已經寫好了——馬斯克希望有生之年，見證人類能夠成為「跨星際物種」，如是者，人類可以擺脫恐龍在地球絕跡的命運。唔好笑，以上科幻小說式敘事是出現在SpaceX的招股書上。咁都得？
請教中環隱世股神，佢話美國最迷人的地方，就是任何人都可以講佢自己深信不疑的故事，然後，你唔使實現，再然後，若華爾街睇中你的故事，你便會夢想成「真」，可以搵到錢。
「你記唔記得Dot Com泡沬呀，儍仔嚟㗎，你仲要問，幾十歲都咁單純。」我就係二十年前買Hi Tech股揩嘢，我其實想說，點解馬斯克可以「呃」到人上火星，不，係移民上火星至啱。補充︰SpaceX去年營收一百八十七億美元，虧損二十六億美元，SpaceX目前虧損還在擴大。
股神笑笑口，吐出三個字︰「本夢比」。哦，明白。本夢比指的是「公司目前尚未獲利，但市場對其未來願景、神奇故事，許以高度厚望，股價便會無厘頭飆升。」據聞SpaceX估值可達接近二萬億美元，馬斯克身家分分鐘爆升至「萬億美元」級別，成為史上最富有的人。
我問股神，中國太空計劃仲有睇頭啦，如果「嫦娥」可以學SpaceX咁上市，你點睇？答曰：「無眼睇。」何解？股神話︰「事關嫦娥也瘋狂。」講完！