曾智華
香港人中，好多百厭星，也不少多口怪，喜歡乜都彈一通，又或攞嚟玩，尤其涉及政府政策及大人物們的言論。
好事！國際城市生活太緊張，有時亂噏透透氣，可舒解積累怨氣與情緒。反正大家亂噏完，又會返自己崗位做返正常嘢。例如早晨茶記那班的士大哥，開工前例必你窒吓我，我玩吓佢，然後開開心心開工去。
早兩日班友仔又興高采烈玩人，玩邊個？振英哥是也。
肥司機：「矮佬，喂喂，振英哥乃國家領導人級數，政協副主席，佢講嘢，究竟幾時代表官方，幾時代表自己呢？」
矮司機：「易啦，請佢以後發表任何言論，學吓『電台戴頭盔』咁款，聲明『節目內容並不代表電台立場，只代表嘉賓個人意見』，咁咪掂囉。係嘞，振英哥講咗乜呀？」
高司機：「佢近日突然批評樓盤命名扮『鬼』嚇人，有英冇中，懶高檔，心態要不得呀！嘩嘩，以佢嘅重量級身份咁講，近年只用英文命名的大廈，會否要立即整返個中文名呀？」
肥司機：「商業世界，自由運作，發展商你估身痕咩，純用英文『扮嘢』，當然屬商業考慮啦。改返變中文，咪冇晒效果？都儍儍哋嘅。其實大廈名點改，純反映當時社會心態及需求啫。」
矮司機：「係呀，記得十年前，我都噴過個內地客一面屁㗎。問佢去邊，佢大大聲——君臨天下！我話，老友，問你去邊咋，你為乜皇帝上身呀？哈哈，後來才知，原來真係有座大廈叫『君臨天下』，使唔使作到咁大呀？其實『天璽』一樣，聽個名都覺得業主們可能心態有啲唔平衡。」
高司機：「我而家就真係心態唔平衡嘞，剛剛有客要車去『英文大廈』呀，我想『振中』唔『振英』都唔得啦，拜拜喇！」