曾智華
幾年前，民政事務局前局長及香港平等機會委員會前主席林煥光拍咗條片，內容與當時的建制派諗法不太脗合，故冇乜傳媒播放，反應也不大，但我佩服佢的勇氣，且絕對認同講法。
佢講乜？正是人誰無過，請各位掌權者捫心自問，在人生路途上曾否犯過錯？當然，有啲畀人揭發，有啲好彩走得甩，但總的來說，人人都會犯錯！
既然人人都會犯錯，如此，就應互相給予別人改過自新，重新上路的機會，絕對不應因一時之錯而將別人前途封殺。
這種聲音，本來對社會很正面、很健康，但當時太過微弱，無法成為主流。終於等呀等，等到一位有代表性人物表態了。邊個？正是保安局局長鄧炳強。
鄧炳強前幾日出席香港青年協會「青年違法防治中心」一項名為「重新出發」的嘉許計劃頒獎禮，表揚十二位曾經犯事而改過自新的年輕人，位位不單改過，更願以自己的經歷，勉勵其他曾失足者再次站起來，踏回人生正路。
鄧炳強高調呼籲社會各界，給予犯事的年輕人多些改過自新機會，並形容社會的信任、接納與包容，將有助年輕人改過及在人生路上重新出發，若一個又一個走回正途，將會成為貢獻香港的龐大力量。
係咪講得好好呢？不過⋯⋯有點可惜，這段「重要新聞」，好似唔多覺有幾多傳媒報道，就算有，都只在不覺眼之處細細段刊登。
今日，小弟率先大大聲作出要求，請所有關心年輕人的掌權者，都Echo鄧炳強局長的呼籲，齊齊再三提醒全個社會，務必要畀機會犯過事的年輕人改過自新。林煥光說得對，誰沒試過走錯路？若如此，為乜唔在需要時，伸出援手拉人一把，齊為香港做點好事呢！