(曾智華)
「談笑用兵」講邊個？可以是撞邪完畢的莫雷拉，真係唔鬧會身痕！過去兩周畀普通馬迷鬧到反肚之後，突然回魂，知道乜叫跑馬。
周三晚贏「星運少爵」相當精彩，談笑用兵，重現流水行雲騎法，輕輕柔柔就彈離個幾馬位W出，仿似冇乜用過力，如今方仔追返上第二位，又有得鍊過喇。
今後每一戰，我都會用放大鏡睇緊莫雷拉點跑，有冇又做「拉縮」。
先唔講明日下午國際一級賽「遮打盃」，改講朝早我會去邊，正是久違了的長洲！今年突然有興趣睇太平清醮，乃因今年太平清醮多咗一重意義，主辦單位與香港中風學會聯手，推廣「談笑用兵」。
老友吳醫生為腦科專家，私診外，公餘積極做義工，尤其瞓身搞中風學會。
點解？老友，若你去香港的舊公共屋邨逛逛就知，現今有不少長者中風。其實中風原因甚多，但以現代科技，只要救得及時，可以大大減輕病情，繼續正常生活。
吳醫生經常提我：「碌Sir，你有影響力，又多上年紀讀者，講多啲『談笑用兵』，等大家牢牢記住，幫到人，也幫到自己。」
乜係「談笑用兵」？正是一個人中風前，會有四大徵狀，若大家自己感覺到或見身邊人如此，就要快快去急症室喇。
「談」，就是突然說話口齒不清，表達困難；
「笑」，就是笑起來兩邊臉部表情不對稱；
「用」，是突然一邊手腳無法用力或麻痹；
「兵」，就是遇上以上病徵，即要行軍迅速，火速到醫院求診。
急救中風，有如跑馬一樣，一字記之曰——快！
明日遮打盃，又睇「浪漫勇士」表演，咁啦，二重彩一隻複式拖「百賀飛駒」、「利森名園」及「浪漫戰神」啦，六十蚊睇吓有冇得嗌。