(曾智華)
正所謂：一講曹操，曹操就到。
周二早上打開《星島日報》，頭條正是講最新政府稅收，公布5月打工仔收到「綠色炸彈」的日子。
食完個早餐去晨運，然後行街市買餸，返歸前照例望吓信箱，果然殺到，大大封「綠色炸彈」就在信箱內。
打從1977年出社會工作，已經收過/填過近五十份報稅表。個人習慣，一收到即填，之後收稅單即畀，全部第一時間，一日都唔拖。
多年來不少各路朋友、同事話我「蠢」，因交稅幾大拖到最後一日，如此就賺息賺到最後一日嘞。
大家想法不同，小弟為人喜歡不拖不欠，所以從不借錢（除咗早年供樓），因天生感覺欠人錢內心唔踏實，成日掛住掛住。呢種心掛掛，絕對影響情緒及健康。乜都唔欠（別人與政府），就可開開心心向前行，毫無牽掛。這種內心舒泰，拖庫房稅係換唔到㗎！
香港真的是稅收天堂，稅制簡單易明又快捷，稅率勁低（香港最大優勢之一）。曾移居外地又或擁有外國護照者必知，歐美國家，包括澳洲等，做咗佢哋國民，即仿似被「全球追殺」，即係全球追稅，稅制極之複雜，稅表極度繁複，而稅率也極重，日日政府想與你分身家。
講講交稅，奉公守法納稅人最為氣頂，因見到不少明明搵大錢而唔報稅、唔納稅者，包括聲明「收現金」的專業人士、司機及店舖。
最近香港的士搞到成身汗，終於開始的電子付款，我坐過十次，十次司機都冇高調擺出八達通或PayMe一類電子付款。試過一次問，對方才毫無表情，慢手慢腳攞部八達通機出來篤，呢種態度，即係話——為乜阻住我逃稅？
各位，記得準時報稅交稅呀，稅局罰款效率好鬼高㗎！