黃秉華
國乒在法國巴黎奧運贏到「開巷」，獲得全部五面金牌以來，就令人擔心，擔心源自中國「小小銀球」面對歐洲非和拉美的強敵，人家個個後生過人，打法又刁鑽，場場勝利都可說是險勝，心臟唔好就不要再追國乒比賽，殊不知，去到最近英國倫敦世界盃，又大步檻過。
「老友，如果國乒好似以往咁無敵是最寂寞，相信全世界會諗計對付中國，尤其是歐洲強國，最興抨擊中國產能過剩，兼且指中國乒乓球隊內卷到令人憂慮。」同意，中國乒乓球若不內卷嚴重，又點會出現人才外溢現象，別的不說，單係張本兄妹就有辦你睇啦。
中國乒乓項目產能過剩，同樣可以成立。台灣時評員撰文分析，國乒花了幾十年悉心栽培運動員，發動全國拔苗工程，已經掌握了一套成熟供應鏈流程，厲害之處係積累了過多的人才，同時又攞到過多的金牌。點好？十幾二十年前，國際體育界有勢力人士建議，把乒乓球賽移出奧運。「吓，理由係乜？」朋友，理由就係中國贏得太多，用佢哋班人的說話講，即係中國乒乓項目產能過剩，咁，唔禁乒乓球，你話禁乜嘢咯，你教我嘞。
一理通，百理明，唔會有人建議減少奧運游泳項目，同時又敢刪除男籃，你懂的，原因美國宇宙最強。
「唔通國乒要特登放水？」呢位大叔，你咁講就唔啱，依家大數據、人工智能、超級電腦全球普及，科學化訓練是為常態，贏唔到金牌就係你有問題，吓哇。