(黃秉華)
各國對海灣戰爭忐忑不安之際，中國公布一份亮麗成績——美以伊2月底至今廝殺四十多天，在這個危急事態重疊的日子裏，今年首季中國經濟增長高於預期，GDP同比增長5%，高過西方專家原先預測的4.8%。唉，打開手機望吓，發達國家對中國好過預期，盡顯酸葡萄心態。
「大哥，你講乜啫，中國唔係發達工業國嗎？成日話超過美國。」「大哥大，中國是發展中國家，你Fact Check先啦。」「無錯，AI即刻有資料，中國在國際定義上仍被視為發展中國家，原因係人均GDP低於發達國家，兼且整體發展不平衡、區域差距大，中國在WTO保留發展中國家待遇。」大家又各表意見，爭住嚟講。
有乜好嘈呢？中國表現好，並非受惠戰爭，而係中國作為負責任的現代化社會主義大國，晨咁早以舉國之力做好準備，尤其能源與糧食問題，別國慘被中東危機衝擊，亞洲國家尤其重創，包括區內發達國家日本、韓國；點解？呢個Point先值得研究。
不過，伊戰負能量尚未完全顯現，西方專家認為中國GDP下季可能轉弱。西方評論始終如一，唔會睇好中國。
「你話西方嫉妒中國？人家以事論事之嘛。」錯，西方行資本自由主義體制，萬事以資本為先，資本求利潤，不同資本家通過不同政治代理人影響政策，自然無舉國之力解決問題，結果？結果咪「齊歡喜」囉。即係點？即係「大家富貴」，明未？中國無加入一齊「富貴」，咁，點會「唱好」你？