曾智華
周三賽馬，本欄提供單單一隻貼士「怪獸叉燒」，認真鎖你，累街坊，但當然我是第一個瓜直，雖然唔使急救，但冇癮到爆囉。本來開定紅酒買定靚叉燒，諗住隻馬一過終點，立即大杯酒大塊肉，點知……唉。
其實呢場未出閘，已知要搣飛，因賠率隔晚係威係勢，五倍幾，小弟心諗——呢啲飛，肯定幕後人啦，今次仲唔起筷？
點知臨場買吓冷啲，買吓又冷啲，開閘前變二十倍！無癮，即係瓜得啦，若有任何機會，豈會咁大隻蛤乸隨街跳呀？
果然，隻馬一出閘已成嚿「叉燒」款，油淋淋大墮後，騎師巫顯東推極佢都冇乜反應，終於頂佢頭槌，竟然輸十個馬位開外。
丁冠豪再全晚食白果，交出如此表現，好難再支持你喎，唯有祝未來兩個月好運啦。
明日母親節，大晒，全港所有男性或群眾活動必須讓路，畀晒母親做主角。所以，提前今日跑馬。
馬迷每人都有心儀騎師，我老友「馬王R」近期不時透過手機「晒」戰績我睇。晒乜？正是佢由4月開始，一於用我個「唔刨大法」，只捧十磅仔妹妹袁幸堯，凡八檔以內，賠率十倍以下，就用佢作二重彩，膽拖幾隻機會馬。如此，中咗十場。即係向我「晒」咗十次威水史，令小弟牙癢癢。
單睇紀錄，袁小妹的確值得捧場，騎功紮實，鬥志勁， 再減十磅，著數到會飛啦。
好嘞，今日一於跟「馬王R」大法。睇睇排位表，袁幸堯出十場，發達，竟然有九場排八檔或以內，真係個天都幫晒佢，包括一、二、四、五、六、七、八、九、十一場。
我會每場入閘前決定去唔去馬，閘前五分鐘，若袁小妹坐騎十倍以下，就用佢做二重彩複式膽，拖五隻機會馬，每場下注一百大元！