大滿貫影后惠英紅早前於第二十屆中國電影華表獎獲頒「優秀女演員」獎，成為香港第一人獲得這個國家级殊榮，絕對是為港爭光！英皇集團主席楊受成博士馬上豪搞慶功宴，更出動新鮮出爐的金像影后衛詩雅（Michelle）、泳兒（Vincy）、周家怡、伍詠薇、何珮瑜（Jeana）、楊天宇（Angus）、李靖筠（Gladys）等群星拱照，場面熱鬧！
紅姐親自揀紅玫瑰送老闆
慶功期間，紅姐跟楊博士展開「玫瑰花互贈大戰」！紅姐先向楊博士送上紅玫瑰，見慣大場面的楊博士雖然被「突襲」，但仍保持尷尬而不失禮的笑容，旁邊的Mani問到：「老闆有冇試過收紅玫瑰呀？」楊博士笑着說：「呀！冇呀」紅姐接着說：「我親自揀㗎！」氹得楊博士笑到見牙唔見眼，不過原來楊博士亦早有預備，馬上回禮，回贈一紮鮮花，場面既溫馨又搞笑。
勉勵後輩要爭氣
楊博士為紅姐安排驚喜慶功，紅姐感觸爆燈，「好感激英皇娛樂一路對我都咁好，要感激Mani，更加要感激我老闆，喺咁多年裏面，公司一直係喺後面一路頂住，我覺得我一定要爭氣，我唔可以丟英皇嘅架。」全場拍手歡呼，她續說：「公司知我身體有啲問題出現，但係我覺得呢啲都係小問題，最緊要我會表現好，同埋我要攞好成績，令到老闆唔會對我失望。跟住落嚟我都會一樣，我唔會因為年紀大要做輕鬆啲，我覺得上天俾咗一個咁好嘅老闆我，出咗咁多力喺我背後，呢個我要感恩，所以我唔會浪費每一次機會。」隨後更化身熱血教練勉勵後輩，「今日見到公司好多後生嘅小妹妹、小弟弟，我知道你哋個個都好有實力，我都希望你哋好似我咁樣，要爭氣，一定要爭氣！幫英皇公司爭氣！預祝你哋前途好似太陽咁樣，照住我哋英皇公司，我哋英皇公司就靠你哋，感激。」
而楊博士開心到預言：「紅姐今次前無古人！下次可能輪到你拎奧斯卡終身成就獎！」紅姐即霸氣接招：「我加油！」楊博士又自爆紅姐領獎當日，公司三喜臨門，「Michelle（衛詩雅）攞影后、謝霆鋒演唱會四場圓滿。我喺呢度再預祝紅姐攞奬攞到唔停手！」
