有港女和同事一行8人，到旺角一間酒樓午膳，但卻遭酒樓指控曾走數過千元，她雖否認，但指仍被酒樓阿姐針對輪流圍攻，全程疑遭員工毒舌招呼句句有骨，女事主嬲爆呼冤，強調「都係第一次嚟」，何來有走數前科？
《星島頭條》向涉事酒樓查詢，一名經理表示事件交「寫字樓」回應，記者向酒樓所屬集團查詢，至今一星期未獲回覆。女事主已就事件報警，並考慮法律途徑處理。
旺角酒樓阿姐圍攻港女屈走數？！被指毒舌招呼句句有骨 事主嬲爆呼冤：我都係第一次嚟！↓↓↓↓
女事主在社交平台Threads發帖表示，上周二（4月29日）與7名公司同事，連同她共8人到旺角一間酒樓午膳，當點完菜後，「有個阿姐走嚟收點心紙，話我好熟面口，記得我」。
女事主當時以為「個阿姐『R』水吹」，隨口答道：「係啊，係啊，有無折打呀？」誰料該阿姐竟指控她兩星期前曾走數：「阿姐指住我話，我係兩個禮拜前有張單未埋。」女事主表示，該張單約一千多元。
車輪戰？阿姐走開 又帶多咗個阿姐嚟認人
女事主即時否認，該阿姐亦行開，但是未幾，「佢又帶多咗個阿姐嚟認人」，兩人在女事主面前不停說：「係喇係喇，係佢。」「你真係有張單未賣喎。」「唔係話你有心走數，不過可能成班人嚟食飯，是但一個唔記得咗。」
女事主再次否認，強調：「今次我都係第一次嚟依間度食嘢。」她以為事件完結，結果在埋單時又被酒樓侍應單打：「個阿姐拎住張單問『今次又係咪你畀錢呀？』」
女事主忍無可忍，決定直接向經理投訴，經理來到表示「係個同事睇咗CCTV，話同我一模一樣樣」，女事主表示要觀看該CCTV片段，以證清白：「如果真係覺得CCTV係我，反正我係到，可以大家一齊對清楚嗰個人係咪我。」
私隱為由拒公開CCTV 女事主報警：三翻四次畀說話我聽
但該經理又以私隱為由「畀唔到我睇」，最後女事主報警，該經理當時承諾「一個禮拜內會畀答覆我」，但現場又向女事主，聲言之前走數張單「千幾蚊係個阿姐自己食返」。
女事主表示，該走數食客根本不是她，「咁又關我Ｘ事呀？！！又唔係我走佢數。」
她表示，她和在場同事都認為「成間鋪，包括經理都覺得係我（之前走數），所以成間鋪上上下下其實都有問題」。
她質疑，酒樓員工「點解講到咁肯定係我又唔報（警）」？「當下見到我，其實佢哋就要即刻報警。」但酒樓員工不報警，卻「三翻四次，走嚟我哋張枱試探，同畀說話我聽」。
憂影響聲譽 考慮循法律途徑追究
她說：「真係嬲咗我成日」，「食餐飯，無啦啦畀人屈我，係好嬲好唔開心，好無奈。」「我嚟你度消費，仲要畀你屈，其實你就算點道歉都好，都補救唔到。」
由於當日同場同事，多位新同事，第一次一齊食飯，「是但有一個真係以為我有做，都好影響我名譽」，她為此將考慮用法律途徑處理。
記者查詢一周 酒樓至今未回覆
警方發言人回覆《星島頭條》表示，4月29日下午2時左右，接獲旺角該酒家一名食客報案，警員先致電報案人了解事件，報案人指被酒樓員工指早前有賬單未付款，但報案人只是第一次到該酒家，根本不可能走數，報案人其後表示和經理協商已解決事件，警員最終無須到場，事件列求警協助案件處理。
《星島頭條》聯絡該酒樓一名經理，該經理表示當日不是她處理，表示事件已交「寫字樓」回應，記者聯絡該酒樓所屬集團，至今一星期未有回覆。
網民：無端端畀人屈，好癲！
不少網民留言力撐女事主，批評涉事酒樓無故冤枉人走數：「無端端畀人屈，好癲！」
網民奇怪酒樓拒公開CCTV片段：「私隱？咁你話我走數，認定我係同一人，咁我睇返自己都算私隱？定係而家又肯定係其他人，係其他人嘅私隱？」
網民又支持女事主循法律途徑處理：「要賠返你精神上損失，你仲可以告返佢誹謗。」有網民又指早前被亦被該酒樓「阿姐屈我呃蟹食，再上菜時發Ｘ我晦氣」。
同場加映：葵芳連鎖酒樓收４次「加一」 網民揭真相反撐酒樓↓↓↓↓
