談善言和駱振偉（Thor）首合作ViuTV新劇《打天下2》，延續「莊惠」一角的前者於拍攝初期已受傷，韌帶半月板撕裂要停工大半年休養，更因影響拍攝進度非常自責。另外，今季Thor演的二世祖新角色「Darwin」，會跟AK演的「志浩」爭奪「莊惠」，Thor更唔覺意洩漏劇情，兩男為爭女大打出手，AK更因太投入角色玩真力𠻹！採訪：杜杜 攝影：譚志光 髮型:Larry Ho@Aveda IL COLPO(阿談) 化妝:German Cheung(阿談) 服裝:MAX&Co.(阿談)、MELSIGN、432hz(Thor)
阿談欣賞Thor工作態度認真，首合作已好快熟絡，「佢做主持多，但喺現場有好多諗法，我都好surprise。」Thor表示一直恨跟阿談拍戲，「聽過佢好多嘢，渴望同佢合作，佢好有諗法，好認真，好enjoy對戲過程，佢好從容又好有direction，又接受你個direction，好開心咁玩每場戲。」被Thor狂讚的阿談連忙道謝。
太攰影響狀態出事
阿談今季對打次數不及上季，但都屬大場面，包括她受傷的一幕，「嗰場大打戲棠哥（歐錦棠）一直好期待，牽涉好多嘢，一shot落又封晒路拍，我哋排好多次都冇事，roll機第一take就瀨嘢。」她懷疑太攰不在狀態出事，「嗰日收工過嚟直踩，動作要來回，呢邊打一次再轉身，再起跳嘅時候，身轉腳未轉，就扯斷咗。」由於開拍1個月屬製作初期，受傷令她份外自責，「我大部份戲都未拍，嗰場又未拍完，book晒伊館拍最尾ending，搵咗日本演員過嚟打，我傷咗所有嘢都要停拍，好擔心。」之後製作組先跳拍其他戲份，等她休息大半年再續拍，「再book多次伊館，再請武田（梨奈）過嚟同我對打，好彩日本演員又就到。」她笑言再拍時除了搵替身幫手，大家都好錫住她，「我唔避佢哋都會避，佢哋好驚我再整親，我想郁佢哋都叫唔好。」
拍打MMA戲難度好高
Thor飾演新角色「Darwin」，他形容是個醉心MMA，有理想的二世祖。繼《繩角》後再拍打戲，他稱兩者分別好大，「上次打classic boxing，今次就MMA，完全兩樣嘢，locking嗰啲我哋完全唔識，所以上次喺《繩角》學到嘅嘢完全冇關係。」他又慶幸今次再跟AK合作，因拍打戲默契好緊要，「靠大家嘅trust ，好彩我同AK打嘅途中唔係好多出錯，AK就無敵，佢練舞記step，主要係我嘅問題，好彩壓力驅使下還好，所有長鏡頭都係兩、三take，棠哥知道我哋去盡咗都收貨。」阿談大讚兩人拍擂台戲一shot落好厲害，「肢體協調同記性都要好好。」
事隔3年再演繹「莊惠」，阿談稱感覺不同，因今次要面對不同逆境，「再接觸返『莊惠』，佢真係唔討好，哈哈！有啲人嘅堅持會覺得好煩，但係又唔會想唔理佢，我就捉住佢對理想嘅堅持，一路做落去。」她又欣慰有班好伙伴，「慶幸着返件袍，紙皮道場嘅伙伴可以幫我recall返『莊惠』出嚟，港隊對手亦幫我投入返角色。」
Thor妒忌又羨慕AK
上季AK演的「關志浩」對「莊惠」一往情深，告白被拒都冇放棄，追問今季兩人關係？Thor反應好大：「哎吔！我唔聽嘞！哈哈！」輕輕劇透的阿談說：「『志浩』係長情嘅人。」而Thor否認是第3者，但就爆料：「Food Buddies囉！哈哈！唔係，有啲瓜葛囉！不過係單方面！」阿談代「莊惠」向「志浩」大派定心丸，「莊惠都幾一意孤行，目標清晰。」「Darwin」條件咁好，會否令「莊惠」心動？阿談就答得好妙，「「莊惠」唔睇呢啲嘢，佢淨係得空手道。」問「Darwin」和情敵「志浩」關係？Thor不離搞笑本色，「單方面嘅憎恨，妒忌、羡慕、中年危機、多疑。」仲自爆兩男為女大打出手，「同佢（AK）嗰場大打有啲機緣巧合，未關呢個人（阿談）事，純粹武術上砌磋，拍其他反而瘀晒，我覺得AK加咗真力，哈哈！（投入咗角色感情？）係囉！因為你（阿談）呀！嗰度幾多石仔，我哋碌嚟碌去。」
《星島申訴王》推出全新項目「我要讚佢」欄目，現誠邀市民投稿讚揚身邊好人好事，共建更有愛社區。立即「我要讚佢」︰https://bit.ly/3uJ3yyF
想睇更多精彩內容，請立即瀏覽「區區有申訴」活動專頁，https://bit.ly/41hgS9E
《星島頭條》新網站有更多精彩內容：http://www.stheadline.com/
