古天后日誌|銀行風暴沒完沒了 市場信心脆弱

3月27日,多雲,間中有雨,天氣清涼。上周五又傳出德銀不穩,其股價一度跌15%,拖累美股早段下跌,其後德銀獲多方支持,加上徊銀迅速宣佈提前贖回15億美元次級債券,向市場發放其財政仍然穩健訊息,股價跌幅總收窄至跌3%收市,美股亦扭轉跌勢,三大指數由跌轉升。上星期本欄已提過,歐美銀行風暴,係沽空淡友一手搞出嚟,啲銀行係無事畀佢哋搞到有事。

無論係美國政府抑或歐洲政府,目前嘅取態都係救存戶,唔救股東,總之存款就擔保拎得到,但銀行股東就肯定要負擔損失,CS就連債權人利益亦被犧牲,無論SVB被拆骨出售,定係CS被UBS收購都好,空軍透過沽空已獲得巨額利潤。只要政府取態不變,繼續係救存戶,唔救銀行,未能阻止空軍沽空下,佢哋都係重施故技。雖然德銀迅速提早贖回債券顯示其財力,但呢一招喺瑞CS爆煲前,CS都已用過一次,結果喺傳言不斷下,存款大量流失,CS最終因為信心問題,存款加快流走下,被逼至無路可退,而踏上被併購命運。

目前空軍尚未被擊退,最新攻擊對象係德銀,有消息指美國國會正討論存款保障新法規,睇下呢招能否挽回市場信心。值得留意係正當中小型銀行股跌到一仆一碌之際,美國嘅商業物業REITS急跌,原因係投資者擔心一旦FRC破產,呢類債務較高嘅REITS將被逼出售資產減債,而疫情期間嘅WFH成為習慣,已令商廈物業空置率高企,商廈估值大減,一旦要被逼低價出售手上物業套現,呢類REITS將蒙受巨額損失。

除咗商業物業REITS瀨晒嘢,持有大量債券嘅對沖基金,近日亦損手爛腳,因為所持債券被銀行勁call 孖展,銀行為自保唔會放水,一向依靠槓桿操作嘅對沖基金,當然難捱,一個唔覺意對沖基金連環爆煲,將進一步打擊市場信心。目前市場信心脆弱,接連嘅爆煲令政府救亡成本愈嚟愈高,一日唔阻止空軍嘅沽空行動,傳聞沒完沒了,只怕歐美銀行風暴會愈演愈烈。

至於港股呢邊,都係嗰句,無水無得去,缺乏資金支持下,即使上周大市能重上二萬大關,都不過係短線炒家落車套現嘅機會,只要大市再一次失守20及250日線,港股弱勢持續,只會再一次向下探底,有波幅,冇升幅。

即時財經