入行超過20年、45歲的陸駿光（嗱喳）終於捱出頭，在電影《流水落花》中做男主角，與鄭秀文飾演寄養家庭夫妻，初嘗做男一的滋味，其實當日陸駿光演藝畢業加入TVB工作後，發展不如理想，入行初期試過在處境劇《皆大歡喜》由古裝版做到時裝版，演出超過20個角色，但全部都係小販、官兵、顧客、打手、托豬工人、修路工人，武師，記者和惡人等等閒角，日前陸駿光接受商台節目《星光背後》的訪問，回想當日的演藝生涯，他坦言：「以前都有怪公司點解唔畀機會自己，但係而家諗返自己都有責任。我最記得有一次同陳豪喺九龍城拍外景，本來諗住行去上車離開，點知聽到有市民話：『嘩！陳豪好有型呀，隔離嗰個， 唉』呢啲說話，嗰陣個心有啲難受，唔明佢點講呢啲說話，我又唔係要鬥啲乜嘢，我都有諗過係咪唔應該再留喺呢一行？」
【點擊睇陸駿光過往相片】：
事業發展不如理想，經濟當然亦有出現問題，陸駿光出道時底薪只有6000元，問到到收入是否穩定？他有點尷尬地說：「穩定，係穩定地少，計埋爆騷都有萬幾兩萬蚊，但呢個唔係一定，好彩屋企唔使我有太大負擔，我同媽咪住，有哥哥負擔，可以奢侈地追夢。」不過他有點自責沒能力盡子女責任：「我記得有一年媽咪60歲大壽，媽咪話好想食鮑魚，嗰陣三個兄弟一齊夾錢，我自己都撳咗三、四蚊出嚟，點知一嚟張單，撳出嚟嘅錢都唔夠夾，嗰刻眼淚想飆出嚟，最後哥哥幫我畀埋，其實我都試過要出啲活動，阿媽畀錢叫我買套好啲嘅衫。」
直到2012年，陸駿光跳糟去港視，事業出現一點曙光：「一來係錢，二來係機會，我好多謝艾威，係佢喺經理人面前推薦我，佢哋都有講對演員嘅planing，人工嘅底薪仲係以前嘅3、4倍，仲未計爆騷，不過機會真係多咗，有好多發揮嘅機會。」可惜最後港視發牌夢碎，陸駿光亦於2015年約滿失業。
不過當時陸駿光選擇與圈外女友茵茵結婚：「太太係我能量嘅泉源，以前我覺得自己發脾氣係『老馮』，唔會理人哋感受，我哋拍拖之後，係佢令知道係唔啱，仲好支持我，就算我想放棄佢都叫我唔好，要繼續堅持。」
