你幾時騷Quali呀?

上周六本欄標題為《你憑乜收咁貴?》,引起不少馬迷老友反應。

  較有趣的比喻為將練馬師視作商品,商品當然有平有貴,正是「百貨有百客」。

  小弟絕對明白。我提出的好奇、疑問……正是你件貨有乜咁巴閉,可以一來到這家「香港百貨公司」,立即標出天價,將所有本來賣開的名牌一腳伸走,唯我獨尊?

  係呀,睇介紹,三十三歲的黎昭昇,真係好鬼巴閉,上季以一百六十場頭馬刷新紐西蘭練馬師歷史上最高紀錄。呢個冠軍名銜,實至名歸,冇人可以挑戰!加上佢贏一級賽,好似食生菜,一季 下十三場,更一再訓練出當地全年最佳馬匹及打 馬等等。

  不過,睇返同是過江龍的練馬師,單講履歷,大衛希斯絕對不在佢之下。

  因希斯曾四度奪得香港冠軍銜,在比紐西蘭更高水準的澳洲墨爾本也曾摘冠,早早打入澳洲賽馬名人堂榜!希斯訓練出的頂級馬也無數!

  又睇睇來自澳洲雪梨的蔡約翰。點解佢叫「蔡神仙」?乃因一空降香港,第一季已成冠軍練馬師,贏馬似斬瓜切菜,令一眾本地薑目瞪口呆,紛紛在晨操時 實佢點操馬,同時亦派探子打聽蔡廄有乜特別的設備、飼料及針藥等等。蔡約翰至今已掃下香港冠軍名銜十一屆,累積頭馬一千四百多場,今季仍會大贏特贏。

  好 ,再講一次,我同意「百貨有百客」,但呢件「黎昭昇」商品,睇背景,仍未似希斯及蔡約翰般,長期畀晒級數及戰績你睇。故此,全馬圈才會極度好奇,點解呢件「商品」可以喊價超高?唔該快快騷兩手Quali,睇睇有幾巴閉!

  弊在佢至今仍掛免戰牌,縮在山洞中唔知搞乜。老友,千祈咪雷聲大大而雨點小小呀!

  今晚有隻馬,我非常有興趣研究,正是第六場葉廄的「紅旺」。引起我好奇,乃因入紙報名時,潘頓本騎同場的「終身美麗」。排位一出,佢竟改騎「紅旺」,而上次殺入位的賀銘年則坐冷板凳。唔……合該有事也!

Uncategorized