(曾智華)
十多年前，大群資深傳媒百厭星，基於同聲同氣同期長大，對香港有感情，價值觀相若，專業堅持不相上下，自然好鬼傾得埋。當時睇睇大家年紀，就快「登六」，於是為維持友誼，為一生Happy Together，就由我與吳錫輝振臂一呼，組成「快樂傳媒老是佛團」，定期分享美食，分享智慧，分享八卦。
結果由八人變十人，由十人變十二人，再變十四人。今年又由十四人變十三人，因施永遠仙遊去也。團內最大年紀七十七，為有「何老大」之稱的TVB及有線集團前最高負責人何定鈞。最細都六十幾，全部已過正常退休年齡。
經過疫情無常及肥施上天堂，大家深感快樂時要快樂，故由本來三個月聚一次的，今年開始，個個月聚，將大家幾十年來唔想講、唔敢講、唔知點講的一切，灌幾杯後，盡訴心中情，真的「愈講愈精采」。
上周聚會，小弟忽發奇想，覺得我 咁開心，而不少同業亦表示有興趣「旁聽」，以解多年之好奇，咁不如來一次「擴大會議」，讓其他資深的同業濟濟一堂，分享美食及八卦話當年晚餐都好喎。
為出師更有意義，我提議每位參加者，除餐費外，捐一百蚊善款畀盧炳松創立的「基督為本基金」，協助臨終人士圓願。
形式盡量自由。初步構思，出席者可以問十三位涵蓋全港傳媒（電視、電台及報章雜誌）的老是佛任何問題，主要集中在：你想知又未有曝光過的一切（All you wanted to know but never been exposed），答得就答，唔答得就繼續讓佢Unexpose可也。
諗下都興奮：吳錫輝、張文新講電台及唱片界；何定鈞講電視台老闆及高層；羅燦、陳家耀、關偉講電視台新聞部秘史；曾展章講電視台競爭慘烈時代的蠱惑招；潘啟迪爆廣告界秘聞。另兩位報章老總講……
「傳媒老是佛慈善夜」必定精采！
